"Frente al consenso del ladrillo, por una nueva politica urbanistica" izenburupean, igandeko 11:00etarako deituta zeukaten ekitaldia Berdeek. "Udalak betoa jartzearen ondorioz, hitzaldia zutik eman behar dudan lehenengo aldia da", kritikatu zuen David Hammerstein alderdi ekologistako eurodiputatuak. "Dena den, ertzean egiten dugu lan Berdeok", esan zuen ironikoki ondoren. Bestalde, udaletan ematen den "gardentasun eza eta herritarren parte hartzeari mespetxua" gogor salatu zituen Hammersteinek. "Getxo, Sopela edo Bakion gertatzen den bezala, hirigintza sustatzaileak dira gerizpeko udala", adierazi zuen Berdeen ordezkariak. Ondoren, "euren auzoa maite eta gehiengoaren onuraren alde borrokatzen dutenez oso harro" dagoela aipatu zuen, Getxorako zerrendan agertzen diren auzotarrei buruz.
Garapen iraunkor arloa
Lurralde Zati Planerako (LZP) "luzamendua" eskatu ostean, Euskal Autonomi Erkidegoko udal guztietan garapen iraunkorra gaitzat izango duen arloa eratzea proposatu zuen Florent Marcellesi Bilborako hautagaiak. "Edozein hirigintza plana kontrolatzea litzateke horren lana, aurretik ingurumenaren gaineko azterketak eginez eta herritarren eta tartean dauden eragileen benetako parte hartzea sustatuz". "Administrazio publikoan zeharkako planak ere bultzatuko lituzke, kontsumo energetikoa eta berotegi efektua eragiten duten gasen emisioa gutxitu aldera", gaineratu zuen.
Bizkaiko Probintzia Hauteskunde Batzordeko baimena zuten arren, atzo goizeko ekitaldia Algortako Fadura kiroldegiko areto nagusian egiterik ez zuten izan Getxoko Berdeek; eta kanpoan eman behar izan zuten hitzaldia David Hammerstein eurodiputatuak eta Florent Marcellesi eta Pedro Gaminde, Bilbo eta Getxorako hautagaiek, hurrenez hurren. Tokiko agintarien "mespetxua" gaitzetsi zuen Gamindek, "Andra Mari auzo elkartearen lokala itxi ostean, baimenduriko ekitaldia ez dutelako egiten utzi". Horretaz gain, EAJ, EA eta Ezker Batuaren eguneroko politika kritikatu zuen, "Getxorako urbanizazio plangintza eta telefonia antenen zabalpena bezalako ekintzek iraunkortasunaren aurkakoak izateaz gain, auzotarrok erdeinuz begiratzen ditugulako". Argazkian, Getxoko Berdeak Fadura kanpoaldean / Berdeak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun