Elkarrizketa eta itunentzat 18 egun dituztela aurretik, igandeko udal hauteskundeetan (pdf) hautatutako ordezkariek hainbat erabaki hartu beharko dituzte datorren ekainaren 16an. Lehenengoa, udaletara eramango dituzten zinegotziak. Izan ere, Espainiako Alderdiaren Legeari esker, emandako botoengatik Eusko Abertzale Ekintzari dagozkion 15 hautetsi jaso dituzte Hauteskunde Batzordearen eskutik EAJk (6), PPk (5), PSE-EEk (2), EAk (1) eta Ezker Batuak (1). Ez da pentsatzekoa popularrek uko egingo diotenik Barrikan, Getxon, Gorlizen, Plentzian eta Urdulizen, lortutako plus horri. Gauza bera esan daiteke Erandio eta Leioako PSE-EEz. Jelkideen kasuan, Azkoitiako kasua alde batera utzita nekez ikusi ahal izan da horrelakorik, alderdiko buruzagitzak debekatu baitzuen jesarlekuak ezker abertzaleari ematea. Hortaz, Barrikan, Berangon, Erandion, Getxon, Gorlizen eta Leioan zaila izango da EAEko hautetsiek bere lana ofizialki egiten ikustea, gutxienez Josu Jon Imaz EBBko presidentea den bitartean. Argazkian, Josu Amezaga Getxoko EAEko hautetsia.
Eusko Alkartasunak, berriz, azken lau urteotan egin ez baina kanpainan zerrenda ilegalizatuei ahotsa emango ziela agindu zuen. Gauzak horrela, ez dago argi zelan egingo duen eta Berangon eskuratutako zinegotzi bakarra EAEri utziko dion. Ezker Batuak, ordea, ezin izango du esan, Getxon egin zuen moduan, sistema proportzionalaren arabera ere Urdulizko zinegotzia berari egokituko litzaiokeela. Izan ere, horretarako 158 boto behar zituen eta 116 baino ez ditu jaso.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun