Igandean egingo dute Algortako krosa

Urtarrilaren 25ean izandako haizeteengatik atzeratu behar izan ostean, igande honetarako, martxoak 22, jarri du Algortako 23. Krosa Itxartu kultur taldeak, El Abra-Getxo Kirol Portua, BBK eta Getxoko Udalak lagunduta. Proban 350 atleta baino gehiago parte hartzea espero dute. Horrenbestez, prebenjamin mailakoa izango da lasterketetan lehena, 630 metro luzerakoa, eta 11:30ean emango zaio irteera. Azkenak ateratzen, berriz, senior eta beterano mailako gizonak izango dira. 12:30ean abiatuta, 4.930 metroko ibilbidea egin beharko dute horiek. Lasterketa guztiak amaitu ondoren, sariak emango zaizkie irabazleei. Baina, behe-mailetako kategorietan, parte hartzaile guztiek jasoko dute oparitxoa. Izen-ematea lasterketa bakoitza hasi baino ordu erdi lehenago egin beharko da Algortako batzokian. Edo bestela info[abildua]itxartu.com e-posta helbidearen bitartez, ostiral gaueko 12ak baino lehen. Lasterketa-egunean mahai berezia izango dute beren dortsalak azkar jaso ahal izateko. Argazkian, Itxartuk antolatuta, 2008ko irailaren 6an jokatutako Getxoko II. Milia.