Ekainaren 25etik uztailaren 13ra bitartean egingo da aurten Getxoko Udako Saskibaloi Campusa, Getxo Saskibaloi Taldeak antolatuta. Ekimena gaur aurkeztu dute sustatzaileek prentsaurrekoan, eta hauek diotenez, udako oporraldian saskibaloian jolastu nahi duten eta herriko hezkuntza zentroetan ikasten duten 6 eta 13 urte arteko neska-mutilen topalekua izan nahi du. Campusaren helburu nagusia da, hortaz, saskibaloia jokatzera bultzatu, "komunikazio hizkuntza nagusia euskara dela", aipatu dutenez. Gainera, eskualdeko saskibaloiko jokalari eta entrenatzaileen lehiakortasun maila hobetu nahi dute. Iñaki Zarraoa alkateak eta Prisco Fernandez Getxo Saskibaloi Taldeko presidenteak nabarmendu dutenez, “eskaintza aparta da udarako, batetik, gurasoen lana eta etxeko bizitza ahalbidetu nahi duelako; eta bestetik, gaztetxoek kirola eginez goza dezaten, elkarrekin bizi daitezen eta ekimenarekin pozik atera daitezen”. Argazkian, saskibaloi campusaren aurreko edizio batetako artxibo irudia / Getxo.net.
Campusa Getxoko Andra Mari herri ikastetxeko kirol instalazioetan egingo da eta hiru txanda izango ditu: ekainaren 25tik 29ra lehenengoa; uztailaren 2tik 6ra bigarrena; eta uztailaren 9tik 13ra hirugarrena. Jarduerak goiz eta arratsaldez egingo dira, etenik gabe, 9:30etik 17:30ak arte, astelehenetik ostiralera, hiru txandetan. Txanda bakoitzeko 110 euro ordaindu beharko da; hiru txandak egiteagatik ordaindu beharrekoa, berriz, 300 euro dira. Eskarmentu handiko prestatzaileek saskibaloian jolasten erakutsiko diete ikasleei eta horrexaz gain, parte hartzen duten guztiek kirol jantziak, janaria eta askaria jasoko dituzte. Edozein gorabehera edo ezbeharrari erantzuteko erantzukizun zibileko asegurua izango dute guztiek. Argibide gehiago eta izena emoteko: www.getxosaski.com; ikastetxetan; edo posta bidez ere: Getxo Saskibaloi Taldea, 175 posta kutxatila, 48991 Getxo.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun