Udaran bizikletak mailegatzeko doako zerbitzua eskainiko dute Getxo udalerrian
Udan bizikletak mailegatzeko doako zerbitzu esperimentala martxan jartzea dauka aurreikusita Getxoko Udala, lana topatzeko zailtasunak dituzten edo baztertze egoeran egon daitezkeen pertsonek gestionatuta, atzo, astearteko Tokiko Gobernu Batzarrean onartu zutenez. Enplegu, Ingurumen eta Turismo zinegotzigoek sustatutako ekimena, printzipioz, hiru hilabetez egongo da abian eta beste urte bete gehiago luzatu daiteke. Iñaki Zarraoa alkateak azaldutakoaren arabera, “ekimena nola doan ikusi beharko da, ondo badoa jarraipena emateko. Izan ere, negozioa neguan ondo badoa, askoz hobeto joango da gainontzeko urtaroetan; eta txarto badoa urte bat luzatzeko aukera egongo da datorren udaberrian eta udan zelan doan ikusteko”. Zerbitzua oraindik zehaztuta ez dauden udalerriko lau tokitan eskainiko dute eta horietan bizikletak hartu eta utzi ahal izango dira. Ordutegia goizeko 10:00etatik 14:00etara eta 16:00etatik 20:00etara izango da. Argazkian, autorik gabeko egunean bizikletak mailegatu ohi dituzte / Getxo.net.
Hasierako zenbatekoa 30.000 eurokoa izango da. Zarraoaren hitzetan, “egitasmo interesgarria da lana topatzeko zailtasunak dituzten pertsonengan izango baitu eragina, garraiobide jasangarria sustatzen duelako eta herritik ibilaldia egiteko aukera emango duelako”. Zerbitzua eskaintzeko lehian arituko diren enpresek egiaztatu beharko dute lana topatzeko zailtasunak dituzten pertsonak laguntzea den helburu soziala dutela eta baita honako gai hauek ere: erabili beharreko bizikleten kopurua, Udalak erosi ahal izango lituzkeen prezioak, egokitze zerbitzua emateko konpromisoa eta zerbitzu bereziak eskaintzea, Udalari promozio bereziak egiteko interesa baldin badu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun