Lasterketa hasiera 10:00etan izango da emakumeentzat eta 10:20ean gizonezkoentzat. "Estatu osoko, 11 komunitate ezberdinetako 450 triatleta inguru espero dira", antolatzaileek azaldu dutenez. Bertan izango dira Ainhoa Murua triatleta olinpikoa, 2005an garaile suertatu zena, Virginia Berasategui lehen hiru ediziotako txapelduna eta Fernando Cabellos kantabriarra, 2004an bertan egindako Espainiako Txapelketa Unibertsitarioan gizonezkoetan irabazlea izan zena.
Bederatzi proba
Bederatzi proba puntuagarri izango ditu aurtengoan Euskal Herriko triatloi zirkuituak eta denak Gipuzkoa eta Bizkaian ospatuko dira: hauetatik sei, esprint distantziakoak eta, hiru, distantzia olinpikokoak izango direlarik. Hauekin batera, Zarautzen, distantzia olinpiko bikoitzeko Euskadiko Txapelketa izango da eta Gasteizen ere beste distantzia olinpiko bikoitzekoa izango delarik.
Aurreko lau edizioetan bezala, Gorlizen emango zaio hasiera, igande honetan, maiatzak 20, aurtengo Euskal Herriko triatloi zirkuituari, Euskadiko Triatloi Federazioak jakinarazi duenez. Proba esprint distantziakoa izango da eta K3 Hiru Kirolak taldeak antolatuko du. Lasterketaren muina, hondartzako parkingean egongo da, boxak bertan kokatuko baitira. Lehendabizi, 750 metro luzerako igeriketa saioa egin beharko dute kirolariek badian zehar: hiruki formakoa izango da ibilbidea, irteera eta helmuga areatzan izanik. Lehenengo trantsizioaren ondoren, triatletek 24 kililometroko bizikleta ibilbide gogorrari aurre egin beharko diote, Orabile eta Andraka (Lemoiz), Asteintza (Maruri), Butroi, Urduliz eta Plentzia igaroko dituztelarik, berriro Gorlizera iristeko. Bigarren trantsizioaren ondoren, azken atalari, hau da, 5 kilometrotako oinezko lasterketari hasiera emango diote, Astondo Ibilbideari bi itzuli emanez. Hondartzan egongo da helmuga. Argazkian, joan den igandean ospatu zen Sopelako duatloiaren irteera / ETF.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun