Sopelako TAOren aurkako plataforma osatzen zuten kideek, maiatzaren 27ko hauteskundeetan, Berdeei babesa emango diotenik ukatu dute, El Correo egunkariak zabaldutakoaren arabera. Orain urte eta erdi desegin zuten taldea, hortaz "ezinezkoa" da alderdi ekologistarentzat botoa eskatzea, adierazi dutenez. Halaber, talde horren "izaera apolitikoa" nabarmendu dute. "Beraz, Berdeekin lotzea faltsukeria da", diote. TAOren aurkako taldea desegin eta horretatik sortutako Sopelaren aldeko Plataformak, ordea, zerrenda bateratuak aurkeztu ditu Berdeak eta auzotarren elkartearekin. Horrela iragarri zuen alderdi ekologistak orain aste batzuk Larrabasterrako Dingo jatetxean egindako agerraldian. Juantxu del Vigo da zerrendaburua. Argazkian, TAOren aurkako protesta bat Sopelan.
Aipatu ekitaldian, Del Vigok azaldutakoaren arabera, azken agintaldian, "gobernatu beharrean, EAJ herriaren jabe egin delako" sortu dute zerrenda bateratua. "Jelkideen gehiengo osoak herritarren nahiei (5.000 sinadura TAOren aurka, 7.800 lagun bozkatzen duten herrian) eta elkarte zein edozein motatako elkarrizketari mespretxua ekarri du", azaldu zuen hautagaiak. Hori dela eta, "politika Ajuria Eneari utzi" eta udal kudeaketari heltzea; besteak beste, Hirigintzan, alderdi guztiek eta auzotarrek parte hartuko duten batzordea osatzea; gazteen autogestiorako lokala jartzea; beharrezkoa izatekotan erreferendumak egitea; eta udal kontuen gainbegiraketa tokiko erakundeaz kanpoko besteren batek egitea proposatzen dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun