Deustuko unibertsitateko kideek zein La Casillako peritoek esku-orriak banatu zituzten ikasle eta irakasleen artean goizean goizetik, egunean zehar zenbait panel komunikatibo, kartel eta pankarta jarri dituztelarik.
Presoen Aldeko Taldeek (PAT) zabaldutako oharra:
Hau ez da demokrazia! Ikastea eskubidea delako, ikasle presoak klasera!
Estatu espainolean espetxeratuta dauden preso politikoek ikasteko eskubidea urratuta dute. 2003an PP eta bere esku dauden indarrek (komunikabideak, hainbat eragile...) aurrera eramandako intoxikazio kanpaina baten ondorioz UPV eta Espetxe Erakundeen arteko hitzarmena apurtu egin zen.
Urte hauetan zehar, nahiz eta UPV ikasle presoei eskaintza egiteko prest egon, EAEko Legebiltzarraren Hezkuntza Batzordea eta Hezkuntza Sailak eskubide hau onartu... UPVk ez du lortu Madrilgo espetxe zuzendaritzaren baimena espetxeetan ikasketak eskaini ahal izateko. Argi geratu da hemengo erakundeen ezintasuna ikasteko eskubidea bermatua egon dadin.
Euskal Preso Politikoei ikasketak burutzeko geratzen zaien aukera bakarra UNEDen bitartez ikastea da, honek dakarren guztiarekin: euskaraz ikasteko ezintasuna, hainbat karrera burutzeko debekua, eskaintza murritza...
Estatu espainolak ez du nahikoa presoak urrundu edo isolatzearekin, ikasteko eskubidea bezain oinarrizkoa den eskubide bat ere ukatzen diete gainera. Oinarrizko eskubide hau eta beste hainbat sistematikoki urratzen dituen estatu bati ezin dei diezaiokegu estatu demokratikoa. Euskal herritarrok gure eskubideak bermatuak izango diren marko demokratiko bat behar dugu!
Ikasle presoak klasera! Estatus politikoa orain!
Bizkaiko hainbat fakultate eta eskola unibertsitarioetan, Presoen Aldeko Taldeek (PAT) antolatutako Amnistiaren Aldeko Astearen bigarren eguean, euskal preso politikoen ikasteko eskubidea aldarrikatu zuten asteartean. Horrela, EHUko Erandio eta Leioako campuseko kafetegi nagusian Ikasle Presoen Txokoa jarri zuten egun osoan zehar. Bertan, Leioako campuseko ikasle presoei buruzko informazioa zabaltzeaz gain, eurei gutunak idazteko aukera ere egon zen. Bitartean, gaur arte iraungo duen errepresioari buruzko erakusketa ere egon zen ikusgai kafetegi nagusian. Bitartean, kontzentrazioak burutu zituzten eguerdi partean Enekuriko Magisteritza Eskolan eta San Mameseko Ingeniarien Goi Eskolan. Horrez gain, ingeniariek jakinarazi dutenaren arabera, "eskolako zuzendaritza lehen egunetik dabil trabak jartzen Amnistiaren Aldeko Astearen baitan antolatzen ari diren ekimen zein mobilizazioak gauzatzeko orduan". Horrela, atzo goizerako antolatutako bideo-emanaldia bertan behera utzi behar izan zutela salatu zuten San Mameseko ikasleek. Argazkian, ikasle presoen argazki eta helbideak / PAT.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun