Atzo eguerdian Deustuko unibertsitatean egindako ekitaldi politikoarekin eman zitzaion bukaera Presoen Aldeko Taldeek (PAT) Bizkaiko zenbait fakultate eta eskola unibertsitariotan astelehenean martxan jarritako Amnistiaren Aldeko Asteari. Lehen bi egunetan "Euskal Herriak bizi duen gatazka politikoaren ondorio diren errepresio politikoa eta ikasle presoen egoera" salatu baziren, azken egun horretan, arazo hauek eta gatazka politikoa bera konpon daitezen "amnistiaren beharra" aldarrikatu zen, PATek adierazitakoaren arabera. Egunean zehar, ekintza eta jarduera desberdinak izan ziren fakultateetan. Horrela, San Mameseko Ingeniaritza Goi Eskolan hauteskunde demokratikoak aldarrikatzen zituen pankarta erraldoia eskegi zuten sarreran; bitartean, La Casillako peritoek EAJren jarrera salatu zuten Errekaldeko batzokiaren aurrean. Gero, kontzentrazioak egin ziren 11:00etan bi eskola unibertsitarioetan. Erandio eta Leioako campusean, berriz, "30 urte eta gero, orain hitza eta erabakia Euskal Herriarentzat!" hitzaldia eman zuten Alaitz Bidaurrazaga eta Asier Virumbrales Askatasuneko kideek 30 bat ikasle bertaratu zirelarik. Argazkian, Deustuan egin zuten elkarretaratzea / PAT.
Ondoren, San Mames, La Casilla, Magisteritza eta Leioako ikasleek Deustuko unibertsitatera jo zuten 12:00etan 60 pertsonek kontzentrazioa egin zutelarik unibertsitateko landan. Ondoren, ekitaldi politikoa izan zen. Txalapartaren doinuek Burgoseko espetxean dagoen Arkaitz Martinez de Albeniz ikasle presoak igorritako hitzei eman zioten bidea. Ekitaldiari bukaera emateko egungo egoeraren irakurketa politikoa egin zen bi gazteren bertsoen ostean. Eta azkenik, Amnistiaren Aldeko Astearekin bukatzeko, luncha egon zen unibertsitateko landan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun