Getxoko hirigintza egitasmoa "legea urratzen" duela salatu dute Europako Batasunaren Batzordean Berdeek
Getxo aldean 8.000 etxebizitza baino gehiago egiteko asmoz, Udalak onartutako Hiri Antolamendu Plan Orokorraren (HAPO) aldaketa Europako Batasunaren Batzordean salatu dute Berdeek. David Hammerstein ekologisten eurodiputatuaren arabera, "ingurumenari kalte handiak eragiteaz gain, Europako hiru arteztarau urratzen ditu". Hammerstein-en hitzetan, "urbanizazio basatia Espainiar estatu osoan ematen da, baita Euskal Autonomi Erkidegoan ere. Joan den astean Getxora egindako bisitan, argiro egiaztatu dut Udala (EAJ, EA, EB) indarreko europar legeak urratzen dituela, hirigintza planak ahalik eta errazenen onartzeko asmoz, ingurumenaren gaineko eraginari buruzko azterlanak egitea eragotziz". "Indarreko legea aintzat hartuta", plangintzaren gaineko hausnarketa egitea eskatu dute Berdeek, "gardentasuna eta herritarron parte hartzea bermatuz". Argazkian, David Hammerstein Getxora egindako bisitan / Berdeak.
Getxoko Udalak bete ez dituen arteztarauak hiru dira Berdeen hitzetan: batetik, ingurumenaren gaineko eraginari buruzko azterlanaren ingurukoa (97/11/CE); bigarren, uraren gainekoa (80/7781/ CEE), "8000 etxebizitza horiek urez hornitzeko zein hondakin-urak biltzeko inolako planik aipatzen ez dutelako"; eta azkenik, hondakin-uren tratamenduari buruzkoa (91/271/CEE). Pedro Gaminde Getxorako zerrendaburuak bere aldetik, Hammersteinek egindakoaz poztu eta, maiatzaren 27an, "betiko alderdien garapen eredu iraungaitzak zigortzea" eskatu die herritarrei.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun