Ertzaintzak LI.D.O. 28 urte mutila atxilotu zuen atzo arratsaldean, lesio delitu bat egotzita. Eusko Jaurlaritzako Herrizaingo Sailak zabaldutako bertsioaren arabera, atxilotuak bere andregai ohiaren lagun bat jo zuen. Mutil hori Gurutzetako ospitalera eraman behar izan zuten. Gainera, eginbideak hasi dituzte bikotekide ohiari tratu txar psikologikoak eragitea leporatuta. Iragan igandean, maiatzak 20, goizaldeko lehen orduan, lagun talde bat Andra Mari frontoian (Getxo) zegoela, lagunartean zegoen neska baten mutil-lagun ohia hurbildu zitzaien, eta beraiekin hitz egiten hasi zen. Polizia iturrien arabera, neska gazte horri bertan zegoen mutil batekin zer egiten zuen galdetu zion LI.D.O.-k. Horren aurrean, neskatilak bakean uzteko eta alde egiteko eskatu zion. Bazirudien mutilak ospa egin behar zuela, baina, bat-batean, gazteetako bat kolpatu zuen. Bertan zeuden gainerako lagunek jarrera hori gaitzetsi eta apartatu egin zuten, alde egiteko aginduz. Erasoa pairatu zuen mutila minbera geratu zen, jasotako kolpeen ondorioz. Goizean, oraindik minak zegoela, Gurutzetara joan zen, eta ospitaleratu egin zuten.
Herenegun (osteguna) salatu zituzten gertakari horiek Ertzaintzan, eta LI.D.O. aurkitu eta atxilotzeko ikerketa jarri zuten abian. Azkenean, susmagarria atzo arratsaldeko azken orduan atxilotu zuten. Bikotekide ohiari ustez tratu txar psikologikoak eragiteagatik, beste delitu bat egozten diote. Atxilotua gaur goizean bertan geratu da epailearen esku, beharrezko polizi eginbideak bukatu dituztenean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun