Lehendabizi, euskararen normalizazioa planteatzerakoan unibertsalki onargarriak diren oinarri juridikoak aitortu behar dira, hizkuntza-komunitate guztiek eskubide maila bera dute euren lurralde historikoetan. Udal mailan ere euskarari ofizialtasuna eta lehentasuna eman behar zaio. Politika horren ezaugarriak honako hauek: baliabidez ongi hornitua, sailartekoa, sektoreartekoa eta epe zehatzak dituena. Horretarako, plangintza malguak behar dira, errealitatean oinarrituak eta mailakatuak. Era berean, udalerrietan dinamika politiko, sozial, kultural eta ekonomiko eraginkorrak abian jarri behar dira euskararen normalizaziora iristeko.
Udalak
Lanerako eremu eta tresna gisa honako hauek zehazten ditugu: udal ordenantzak, normalizazio-planak, azpiegiturak eta funtzionamendua, aurrekontua eta diru-laguntzak, aukera legalen erabilera, euskara ofiziala, berezkoa eta lehentasunezkoa izendatzea, euskararen transmisioa bermatzea eta Helduen euskalduntzea bultzatzea. Zehaztu beharra daukagu herritar euskaldunak % 70tik gora dituzten Euskal Herriko udalerri eta eskualde guztiak direla udalerri edo gune euskaldunak. Hizkuntza-komunitatearen babeserako lurralde-esparrua eta euskararen normalizazioa azkartzeko eremu intentsiboak dira hauek.
Ezinbestekoa da euskararen parekidetasuna eta berreskurapen osoa, hurrenez hurren, bermatzea ezagupenaren eta erabileraren aldetik. Bestetik, euskalgintzak hainbat alditan aldarrikatu duen eskaerarekin bat egiten dugu, Euskal Herriko toki-erakunde orok gutxienez aurrekontuen % 2 esleitzea, urtero, euskara normalizatzearen egitasmorako.
Herri-gogoa
Euskal hizkuntza-komunitatea berrosatzeko herri-gogoa, Euskal Herria euskalduntzeko kontzientzia eta borondatea, ezinbesteko eta oinarrizko osagaia da. Azkenik, kontuan hartuz euskararen normalizazioaren gaia zehar-lerro izaera duela eta hizkuntza-politikarik gabeko jardun politikorik ez dagoela euskarari instituzioen organigraman erdigunea eskaintzeko deia egin nahi dugu. Joera handia dago kultura- edo hezkuntza-batzordeetatik soilik kudeatzeko eta hori oztopo bilakatzen da beste sail batzuetan euskararen normalizazioari behar den indarrez ekiteko. Hizkuntza-politika horren zutabeak gure ustez, zeintzuk diren zehaztu dugu dokumentu batean, hain zuzen "euskararen ordenantza eredugarriak" arautegi proposamenean.
Euskararen Gizarte Erakundeen Kontseilua
http://www.kontseilua.org
Hauteskundeen atarian udaletan hizkuntza-politika egokia garatzea eskatu dute
"Euskara sustatzeko eta euskalgintza babesteko akordio soziopolitikoa" osatzen dugun alderdiok udalerrien hizkuntza-politikan aurrera egiteko hartutako konpromisoa azaldu nahi dugu. Kontseiluak sustatutako akordioa 2004ko azaroan sinatu genuen Aralar, Batasuna, Eusko Abertzale Ekintza, Eusko Alkartasuna eta Zutik alderdiok, Euskal Herriko beste 6 sindikaturekin batera: EHNE, ELA, ESK, HIRU, LAB eta EILAS. Udal hauteskundeen testuinguruan euskalgintzak azaldutako kezkari erantzun nahi diogu idazki honen bidez, udaletan ere hizkuntza-politika egokia garatu behar dela azpimarratu nahi dugu. Hori dela eta, udalerrietako hizkuntza-politika egokirako irizpideak azalduko ditugu. Argazkian, Portugaleteko Udalak Euskararen Eguna debekatu ostean, EHEk egindako elkarretaratzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun