Bihartik aurrera antzerkiz beteko dira lau egunez Leioako kaleak. Izan ere, Euskal Etxeen plazan, Errekalde plazan, Bulebarrean, Jose Ramon Aketxe plazan, institutuan, Estartetxe kalean, Ikea Barri plazan, Kultur Leioan, Sabino Arana kalean eta Kutxa Metafisikoan egongo dira emanaldiak. Kultur Leioan eskainiko diren obrak ikusteko, 12 euroko sarrera ordaindu beharko da.
Era guztietako proposamenak hartuko ditu Umore Azokaren zortzigarren edizioak. Deigarrienen artean, Iñaki Matak bakarrik antzeztuko duen "Barreras" lana dago, zeinean aulki gurpildunean doan gizon batek bidean topatzen dituen etengabeko oztopoak ikusiko baitira. Edota Australiatik datorren Alan Star konpainiaren "The Paraffinalien" ikuskizuna; suaren argitasuna eta iluntasuna lagun, hausnarketa bideratu nahi duen lana. Bestalde, Katalunia eta Euskal Herriko La Residual eta Portal 71 taldeen elkarlanetik jaiotako egitasmo hezitzailea da "La residual", hirietako hondakinez egindako panpinak protagonista dituela.
Zeruko artea
Aurten ere, Zeruko Artea gune bereziak zirko ikuskizun arriskutsuak hartuko ditu: trapezioa, Txinako masta, hari laua, oihal hegalariak, Alemaniako gurpila... Euskal Herriko Zirkus Frak-en eskutik, Kataluniako lau taldek antzeztuko dituzte akrobaziak: Circo Delicia, Lorrojo, Mo eta Zahir Zirkus.
Informazio guztia Umore Azokaren web gunean aurkitu dezakezu: eskuko egitaraua (pdf), liburuxka...
Maiatzaren 31tik ekainaren 3ra egingo da Leioako Umore Azoka. Mundu osoko 49 taldek 160 emanaldi eskainiko dituzte herriko 17 agertokitan. Azokaren zortzigarren edizioan parte hartuko duten Euskal Herriko hamar taldeetatik bostek jaialdi hau aukeratu dute euren azken lanak estreinatzeko. Hain zuzen ere, Organik, La Pez (leioaztarrak), El Destilador de Ideas & Lesnadies, Deabru Beltzak eta Latirili Teatro konpainien antzezpen berriak lehengo aldiz egongo dira ikusgai Leioan. Baina horietaz gain, bertako beste bost antzezlan eskainiko dira: Debote Emboteren "Ensillados", La Bandaren "Makina", Iñaki Mataren "Barreras", Popotamus Teatroren "Amor desmadre" eta Tandiren "Crei que era piedra y un soplo tuyo me convirtio en arena". Emanaldiez gain, hausnarketak eta eztabaidak tokia izango du Umore Azokan: Artekale jardunaldiak egingo dituzte ekainaren 1ean eta 2an. Kaleko arteen hizkuntza berriak, eta sormenean, banaketan eta erakustaldietan sortu diren beharrizanei aurre egiteko estrategiak izango dituzte mintzagai aurtengo jardunaldietan. Argazkian, Iñaki Mataren "Barreras" ikuskizuna.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun