Egizu elkartea 2000. urtean sortu zen eta Bizarra Lepoan elkarteak eta udalerriko hiru euskaltegik osatzen dute eta Berbalaguna ekimenaren eta kultur ekitaldi batzuk antolatzearen bitartez euskararen erabilera sustatzearen alde egiten du lan udalerrian.
Berbalagunak martxan daramatzan 7 urteotan ia 400 lagunek hartu dute parte eta une honetan 110 bat pertsona 14 taldetan banatuta euskaraz mintzatzen dira "hainbat ekitaldi egiten duten bitartean, esate baterako, ibili, zinemara joan edo yoga praktikatu” Rocio Luces, elkarteko koordinatzaileak azaldu duenez. Hain arrakastatsu suertatzen ari den ekimen horrekin aurrera segitzeaz gain, elkarteak beste kultur ekimen ugari ere antolatzen ditu, tartean, ipuin kontalariren saioak, bertsolaritza ikastaroa, txangoak, hitzaldiak eta proiekzioak. Egizuk Euskal Herriko 50 bat elkarterekin batera ere antolatzen du hainbat ekitaldi.
2004tik 2007ra Egizu elkarteak burutzen duen Berbalaguna proiektuari dirulaguntza igo beharrean jaitsi egin dio Getxoko Udalak, %10,88, alegia. 2004an Egizu elkarteak 14.414,17 euro jaso zituen Getxoko Udalarengandik 90 mintzalagunen mintza praktikak, euskara erabilera eta kultur eta aisialdi ekintzak burutzeko. Aurten, berriz, 12.846 euroko inbertsioa baino ez du egin Udalak kontzeptu horretan, Berbalaguna proiektuan dagoeneko 110 kide daudela. UKBERRI.NETek egindako galderei erantzuten, Rozio Luces egitasmoaren koordinatzaileak onartu du "gerrikoa oso estu" izango dutela aurtengo egitasmoa burutu ahal izateko, eta "datorren urteari begira igoera dezente bat" aldarrikatuko dutela. Lander Solozabal Bizarra Lepoan udalerriko euskara elkartearen presidenteak, berriz, gogoratu du Topaguneak 100 bat mintzalagun duten egitasmoentzat 25.000 bat euroko aurrekontua gomendatzen duela: "Getxokoa lehenengoetariko bat da eta dagoeneko zaharkituta gelditu da aurrekontu aldetik. Proiektuaren erabiltzaile igoera kontuan hartu eta Euskal Herriko egoerara hurbildu behar da". Bere aldetik, maiatzaren 24an egin zen hitzarmenaren sinadura ofizialean (argazkian), Imanol Landa EAJren Euskara zinegotzia eta alkategaiak adierazi zuen "hitzarmena Getxoko Udala euskararen erabileraren alde aurrera eramaten ari den politikaren barruan kokatzen" dela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun