Gurasoen artean euskara sustatzeko kanpaina abian da eskualdean
2007ko eka. 5a, 14:56
Alkarbide Bizkaiko Euskara Zerbitzuen bilguneak "Esan eidazu euskaraz" izeneko kanpaina jarri du martxan, Bizkaiko Foru Aldundiaren babesarekin, euskara belaunaldiz belaunaldi transmititzeak daukan garrantzia nabarmentzeko asmoz. Ume jaioberriak eta 1 eta 6 urte bitarteko haurrak dituzten gurasoak izango dira kanpainaren hartzaileak. Arduradunek prentsa ohar bidez azaldu dutenez, egitasmoan parte hartu duten 31 udalerri eta hiru mankomunitate bizkaitarretako 17.000 familia izango dira kanpainaren hartzaileak. Hartzaileek hizkuntza geroratzeak duen garrantziaz sentiberatzeko hainbat euskarri jasoko dituzte. Foru iturrien arabera, Berango, Erandio, Getxo eta Uribe Kostako Mankomunitateak ere hartuko dute parte egitasmoan. Argazkian, Altzaga ikastolako umeak.Horrela, ume jaioberriak dituzten gurasoek, alkateak edo beste udal ordezkariren batek sinaturiko gutun bat eta umearen ingurune hurbilean euskara sustatzeko aholkuak biltzen dituen hiru-orriko bat jasoko dute. Bestalde, 1 eta 6 urte bitarteko umeak dituzten gurasoei, ume jaioberriak dituztenei moduan, gutuna, aholkuak batzen dituen hiru-orrikoa eta opari bat bidaliko zaizkie, baina kasu honetan askari-poltsa bat izango da oparia. Udalerri batzuek, material horri laguntzeko, "Ku-Ku" liburuxka berrargitaratu dute. Liburuxka hau iaz argitaratu zen lehen aldiz, eta izan zuen harrera ikusita, aurten berriro ateratzea erabaki da. Liburuxka honetan, gurasoek euren seme-alabekin hitz egiteko oinarrizko euskarazko hitzak eta esamoldeak biltzen dira. Horrez gain, udalerri batzuek haurrentzako abestiak dituen "Txikia izanik" CDa ere banatu dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun