Karlos Galan eta Ander Sanchezen ekimenez, abenduan ekin zioten kajoi flamenko ikastaroari, Algortako Etorkizuna mendi taldeko lokalean. Orduan, zazpi lagun izan zituzten ikasle eta jarraitzea erabaki zuten. Ostiraletan ez ezik, eskolak ostegunetan ere ematea erabaki zuten; baina horiek porrot egin zuten Galanek aipatu duenez. "Hala ere, ostiraleko taldea guztiz egonkortuta dago eta besoak zabalik ditugu parte hartu nahi duten guztientzako", gaineratu du ikastaroko koordinatzaileak. Gainera, txalaparta ikastaroak ere izaten dira bertan, Uribe Kostako Txalaparta Ekimenetarako Sustapen Taldearen (UKTEST) eskutik. Galan eklkarte horren kide ere bada eta berak dioenez, "giro ona sortzea" da ikastaroon helburua: "Maiz ikasleen lagunak ere elkartzen zaizkigu eta erlojuari begiratu barik aritzen gara", azaldu du. Ordaindu beharreko 40 euroak, berriz, alokairua ordaintzeko izaten dira: "eskerrak Etorkizunak lokala uzten digula, bestela...", dio Galanek.
Giro ezin hobea
Irakasle dabilen Ander Sanchezek, berriz, ikastaroa oinarrizkoa dela azaldu du: "teknika eta erritmoa ondo hartzea da asmoa eta, bide batez, beste perkusio tresnei aukera ematea", dio. Etxean praktikatuz ahalik eta gehiago ikasteko kajoi flamenkoa erostea ere gomendatu ohi die ikasleei. "Denetarik dago, merkeak (75-90 euro) zein garestiak (250-290 euro). Gainera, Interneten kajoia zuk zeuk egiteko argibideak aurki ditzakezu", nabarmendu du Sanchezek. Jon Ingunza eta Goizeder Moral ikasleek, berriz, ostiraleko eskolak "laburrak" egiten zaizkiela aitortu diote UKBERRIri eta ez dute bere kajoi propioa erostea baztertzen. Izan ere, antolatzaileek aipatu bezala, ostiralero sortzen den giroari "ezin hobea" deritzote biek.
Irailean emango dio hasiera ikasturte berriari Algortako kajoi flamenko eskolak
Ekainekoa kurtsoko azken hilabetea izango dute Algortako kajoi flamenko ikasleek. Izan ere, uztaila eta abuztuan oporrak hartu eta irailean emango diote hasiera ikasturte berriari. Dagoeneko horretan ibili diren zazpi neska-mutilek jarraitzeko asmoa iragarri dute, eta ikasle berrientzako ere tokia egongo da antolatzaileek UKBERRI.NETi adierazi diotenez. Izena emateko 656 798 622 (Karlos) telefono zenbakira deitzea besterik ez dute interesatuta dauden guztiek. Eskolak ostiraletan izaten dira, Etorkizuna mendi taldeko lokalean (Basagoiti etorbidea 69), 19:00etatik 20:00etara. Gainera, kajoi flamenkorik ez edukitzea ez da traba, antolatzaileek eurek jartzen baitituzte. Salneurriari dagokionez, 40 euro dira hilean. Argazkian, kajoi flamenko irakasle eta ikasleak joan den ostiraleko eskolan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun