Txorimaloren urteurrenaren harira antzerkia eta kantautoreak izango dira arratsaldean Algortan
2008ko mar. 27a, 12:44
Asteartean, martxoak 25, eman zitzaion hasiera bost egunetan zehar Algorta eta Getxo herriak "jaia eta borrokaz margoztuko dituen" Txorimalo gaztetxearen bigarren urtebetetzeari. Lehenengo egunean, dantzariek, bertsolariek eta trakak abiatu zuten egitaraua. Algortako Gazte Asanbladako (AGA) kideek UKBERRI.NETi adierazi diotenez, jende andana bildu zen Txorimaloren urteurrenaren hasiera ospatzeko. "Luntxa eta gazteek berotu zuten giroa", aipatu dutenez. Ondoren, film laburren emanaldia egin zuten ospakizunen lehenengo eguna bukatutzat emanez. Atzo, berriz, Uribe Kostako gazte asanbladak lehian aritu ziren agrolinpiaden txapelketan. Lagun ugari bildu ziren, eta eguraldiak kale egin arren, hainbat proba burutu ahal izan zituzten neska-mutilek. Horrela, "kirola eta jaia uztartuz, giro ikaragarria sortu zen gaztetxean", nabarmendu dute AGAkoek. Oraindik ere, larunbatera arte ekimen eta eskaintza ezberdinak egongo dira, bai Txorimalon, bai Algortan bertan. Gauzak horrela, gaur, arratsaldeko 6ak inguruan, "Kalea gurea da" koblakari antzezlana egongo da ikusgai Txiki Otaegi plazan eta ondoren kantautoreak. Argazkian, sokatira proba atzoko agrolinpiadetan.Ostiralera helduta, manifestajaia abiatuko da Algortako Txiki Otaegi plazatik 7:30ak inguruan eta, ondoren, Getxoko Txorimalo gaztetxean herriko musika taldeen jaia egongo da. Azkenik, larunbatean, II. Tortilla Txapelketa egingo dute 12:00etan eta, ondoren, herri bazkaria. Eguna bukatzeko kontzertuak (Pikadura, D.A.R eta Iron eta Maider) eta ekitaldia izango dira Txorimalon. "Eskaintza paregabea dugu, beraz, gaztetxearen bigarren urteurrenaz denok gozatzeko. Hartara, parte hartzera dei egiten dizuegu, ospatzeko eta borrokan jarraitzeko beta dugu eta", adierazi dute gazteek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun