Gobela ibaia egokitzeko egitasmoaz arituko dira udal arduradunak eta auzokideak
Getxoko Gobernu Taldeak Uholdeetako Batzorde Berezia deituko du berriro 15 eguneko epean. Gobela ibaiaren egokitze hidraulikoko egitasmoari buruz, Udaleko alderdi politikoek zein ekaineko uholdeen ondoren sortutako bi ellkarteetako ordezkariek aurkeztu beharreko hobekuntza proposamenak aztertuko dituzte, bilera horretan. Irailaren 16ko batzarren, udal arduradunek Urak, gaian eskumena duen Eusko Jaurlaritzaren menpeko Uraren Euskal Agentziak Gobela ibaia egokitzeko idatzitako proiektu hidraulikoaren berri eman zuten, tokiko iturrien arabera. “Eztabaida Urak idatzitako proiektuaren arabera urak gaina hartzeko arriskua duten inguruetan, eta proiektua hobetzeko Udalak har ditzakeen neurrietan zentratuta egon zen”, Joseba Arregi Hirigintza zinegotziak azaldu duenez. Hurrengo egunotan, bileran parte hartu zutenek aipaturiko proiektuari buruz dituzten proposamenak eta iradokizunak bidali beharko dizkiote Udalari, horrela, bigarren bileran, proiektuari buruzko behin betiko erabakia hartzeko baldintzak izan daitezen. Lehenengo batzarra egin aurretik, tirabira egon zen auzokideen eta udal arduradunen artean, Gobela ibaiaren garbiketa lanei buruz. Argazkian, udal langile bi errekan.
Era berean, joan den astearteko bileran, Gobernu Taldeak Udaleko zerbitzu desberdinek estolderia sarea garbitzeko egindakoaren eta horren gaineko proiektuen idazketen berri eman zuten. "Udala joan den irailaren 1etik aurrera ibaiaren uberkako sastrakak ere kentzen ari da. Hori ezin izan da lehenago egin Eusko Jaurlaritzaren Ingurumenaren legediak ez duelako uzten, mozketak irailetik otsailera bitartean baino ezin baitira egin", aipatu dute. Azkenik, kaltetutakoei emandako dirulaguntzen berri ere eman zuten. "Orain arte 225.347,59 euro banatu ditu Udalak dirulaguntza desberdin batzuen bitartez, horietariko batzuk dagoeneko guztiz bideratuta. Gainontzekoak tramitatzen ari dira", tokiko agintarien arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun