Esklerosi anizkoitza gaixotasun neurologikoetatik sarriena da gazte/helduen artean, Eugenia Epalza Fundazioko kideek azaldu dutenez. Gaur egun, Euskal Autonomia Erkidegoan (EAE) 2.000 inguru dira gaixoak eta sintoma sarrienen artean daude arazo sentsitiboak, orekarenak eta mintzairarenak, ikusmenaren eta urologia sistemaren alterazioak eta gorputzaren ahulezia eta kasu larrienetan paralisia. Hain zuzen, sendaezinezko gaixotasun neurologiko horrek eragiten dituen arazoak ezagutzera ematea eta errehabilitazio zerbitzuetarako dirua lortzea dira Kosta Trail lasterketaren eta aurten hamargarren urtea duen Busti Zaitez kanpainaren helburuak. Batetik, 1.400 lagun batu nahi dituzte kirol probak; bestalde EAEko 85 tokitan egongo da aurten esklerosi anizkoitzagatik "bustitzeko" aukera.
Metro batzuk
Busti Zaitez kanpainan parte hartzen dutenek metro batzuk igeri egin beharko dute hondartzan zein igerilekuan eta, egunaren amaieran, toki guztietan egindakoak batu egingo dira. Uribe Kosta eskualdean, Ereaga (Algorta), Arrigunaga (Getxo), Gorliz, Plentzia eta Arrietara-Atxabiribil (Sopela) hondartzetan eta Fadura (Algorta), Astrabudua, Erandio eta Sakonetako (Leioa) igerilekuetan jarri dituzte hitzorduak.
Eugenia Epalza Fundazioak antolatuta, Kosta Trail lasterketaren bigarren edizioa egingo da igande honetan, ekainak 10, Uribe Kosta eskualdean. Esklerosi anizkoitzak eragiten dituen arazoak ezagutzera eman eta errehabilitazio zerbitzuetarako dirua lortzea dira ekimenaren helburuak. Horrenbestez, hiru lasterketa ezberdinetan parte hartzeko aukera egongo da: lehenengoa, Portugaleten hasi eta Gorlizen amaituko den maila handiko mendi lasterketa (30 kilometro); bigarrena, maila ertainekoa (20 kilometro); eta azkenik, txikiei zuzendutako ibilaldi neurtua (10 kilometro). Azken biak Sopelako udaletxe plazan hasi eta Gorlizko hondartzan amaituko dira. Izena ematea hilaren 9ra arte zabaldu dute, Artea merkatalguneko Forum Sport dendan eta www.forumsport.com webgunean. Bestalde, Busti Zaitez lelopeko kanpaina uztailaren 8an egingo dute hondartza eta igerilekuetan. Argazkian, Iñigo Gonzalez iazko lasterketa nagusian bigarren, Galeatik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun