Chicagon eman zioten bertako sari bat, oso lehia gogorreko txapelketan, besteak beste Otis Rush eta Magic Slamekin. Bere lehen kontratua sinatu zuen orduan, Artistic Recordsekin. 1960an Chess Records etxeak fitxatu zuen, eta Muddy Waters, Willie Dixon, Sonny Boy Williamson eta Little Walter bezalako blues legendekin aritu zen. 1960ko eta 1970eko hamarkadetan oso ezagun izan zen "publiko elektrikoaren artean", bereziki Junior Wellsekin bikotea osatu zuenean.
Buddy Guy bere estiloa zehaztuz joan zen, pixkana, "Chicago Blues" delakoaren aitetako bat bihurtzeraino. Ordutik musika genero honetako figurarik adierazgarrienetako bat da, eta eragin handia izan du Led Zeppelin edo The Rolling Stones banda historikoengan, bere konposizioak haien estilo eta musika eredu bitxiak garatzeko oinarri izan baitziren. Rolling Stones banda mitikoarekin hasierako modura jardun zuen, Europako bira batean, 1970eko hamarkadan.
Bizi bizi
Adinean aurrera doan arren, Buddy Guyk segitzen du kontzertuetan bizi-bizi agertzen, hasieratik amaierara arte elektrikoak diren kontzertuetan. Bere gitarra estilo bikainarekin osatzen ditu emanaldiak, artista jenial baten indar eta energiaz kantatuz, mundua bereganatuz, hasiera-hasieratik.
Motibazio etengabeak kontzertu bakoitzean gorago iristera bultzatzen du Louisianako gitarrista eta abeslaria, artista handia dela erakutsi guran. Zuzeneko kontzertuetan grinatsu aritzen da, eta Hendrix bezain indartsu agertzeko, B.B. Kingen pare punteatzeko, xume eta dotore, Hookerren kadentziarekin jotzeko, eta "esku motela" bezalako estiloen giro epelak lortzeko gai ere bada.
Bost Grammy Sari, eta 23 W.C. Handy Sarik adierazten dute zelakoa izan den artista handi honen ibilbidea; 2005eko martxoan ondo-ondo merezitako tokia lortu zuen Rock and Rollaren famaren aretoan. 40 urte luzeko karreraren ostean, Buddy Guyk blueseko maisua izaten segitzen du, ezbairik gabe.
Getxoko XIX. Nazioarteko Blues Jaialdiak aurrera darrai eta larunbat honetan Buddy Guy (argazkian / Getxo.net) blues-gizon estatubatuar handia izango da Itzubaltzeta / Romoko Santa Eugenia plazan 21:30etik aurrera kontzertua eskainiko duena, antolakuntzako iturriek jakinarazi dutenez. Jaialdiko kontzertu guztietan bezala, sarrera dohainik da. George "Buddy" Guy (Lettsworth, Louisiana, AEB 1936), bluesaren legenda bizietako bat, 1950eko hamarkadaren lehen urteetan hasi zen AEBtako eszenatokietan jotzen, Baton Rougeko banda desberdinetan (Louisiana). Hamarkada haren amaieran Chicagora joan zen eta han, Muddy Waters eta Howlin" Wolfen mailako artisten eragin indartsuarenpean, bere gitarra-melodiak eta ahots-trebetasunak hobetu zituen. Urte haietan blueseko izar historikoen ondoan jardun zuen eszenatokietan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun