Ekainaren 15ean sartuko da indarrean bizikletak dohainik mailegatzeko zerbitzua, aste honetan, Getxoko Gobernu Batzarrak Ekobizi Movilidad S.L. enpresari 30.000 eurotan eman ondoren. Udal agintariek, hasiera batean, bizikletak hartzeko eta itzultzeko lau toki aurreikusten bazituzten ere, azkenean bidegorri batek batzen dituen bi leku baino ez dira egongo, hain zuzen ere, Ereagako turismo bulegoa eta Bizkaiko Zubikoa. Horietan, erabiltzaileek nolabaiteko doako kontratua egin beharko dute. Bizikleten doako mailegua gehienez bost ordutarako izango da, baina aipatutako tokietara joz gero erabiltzaileek berriro hartu ahal izango dute bizikleta. Ordutegia 10:00etatik 14:00etara eta 16:00etatik 20:00etara izango da, baina bizikleta arratsaldeko 19:00etarako itzuli beharko dute erabiltzaileek. Argazkian, autorik gabeko egunean bizikletak mailegatu ohi dituzte / Getxo.net.
Zerbitzua datorren irailaren 15era arte izango da indarrean era esperimentalean eta honako hiru helburu hauek ditu: enpresa esleipendunaren bitartez lana topatzeko zailtasunak dituzten pertsona batzuei lana topatzera laguntzea, bizikleta bezalako garraiobide jasangarria eta ez kutsakorra sustatzea eta Getxotik bizikletaz ibilbide bat egiteko aukera eskaintzea, batez ere gure udalerria bisitatzen dutenei. “Zerbitzua ondo badoa Gobelako eta Fadurako kiroldegiak ekimen honetan inplikatzen saiatuko gara, bidegorriak aisialdirako izan ez ezik alde batetik bestera, esate baterako Kiroldegietara edo ikastetxetara, joateko ere erabiltzea nahi baitugu”, azaldu du Iñaki Zarraoa jarduneko alkateak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun