Biharamunean, larunbatean, aurtengo jaialdiaren artista nagusia aritu zen: Buddy Guy. Louisianako musikari handiak ez zuen kale egin eta kontzertu bikaina eman zuen, eta 5.000 ikusle inguru bildu ziren bertan, nahiz eta eguraldia txarra izan. Ordu eta erdiko saioa eskaini zuen Buddy Guyk eta maisutasunez jardun zen. Publikoak blueseko mito biziaren musikaz gozatu zuen eta erabat menperatuta amaitu zen.
Azkenik, Getxo&Blues jaialdiari amaiera bikaina eman zion atzo Zora Young gaur egungo blues panoramaren abeslari ospetsuenetarikoak. 2.000 lagun izan ziren Getxon abeslari honen ahots sakonaz gozatzeko. Hiru hamarkada baino gehiagoko jarduera dauka Youngek eta, oso gaztea zelarik, gospelaren eskutik hasi zuen bere jarduera, nahiz eta hurrengo urteetan rhythm&bluesera pasatu.
Guztira 10.000 bat lagunek gozatu zuten joan den asteburuan Getxoko XIX. Nazioarteko Blues Jaialdiaz, tokiko kultur iturrien arabera. Hainbat estiloko musikariak eta taldeak bildu ziren Itzubaltzeta / Romoko Santa Eugenia plazan. Bertan, Hash taldea, Sherman Robertson & Blues Move, Buddy Guy eta Zora Young aritu ziren ostiraletik igandera arte. Antolatzaileek adierazi dutenez, lehenengo jardunaldian, Hash euskal taldeak ondo berotu zuen giroa kontzertu nagusirako. Bertan Sherman Robertson eta Blues Move talde britainiarra izan ziren protagonista; 3.000 ikusle bildu ziren artista honen musikaz gozatzeko. Robertsonek kontzertu elektrikoa eskaini zuen eta, ohi bezala, hainbat estilo uztartu zituen: Texasko bluesa, zydeco doinuak eta rhtythm&blues, besteak beste. Argazkian, Buddy Guy.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun