Txotxongilo Eguna bihar arratsaldean abiatuko da, Itzubaltzeta / Romoko Santa Eugenia plazako karpan, Jordi Bertran txotxongilolariaren eskutik. Gaueko 10etatik aurrera, artista katalanak bere azken ikuskizuna antzeztuko du: "Ofelia". Bertran maisu bilakatu da txotxongiloaren munduan. 1987an hasi zen bere jarduera publiko helduaren artean arte hori hedatzeko asmotan eta, ordutik hona, 30 herritan baino gehiagotan aritu da eta zenbait telebistatan aurkeztu ditu bere lanak.
Nork bere txotxongiloa
Larunbatean zenbait saio egingo dira jarraian Romon eta Areetan, 11:30etik 22:00etara. Gainera, txikienek Xake plazan eta Ibaiondo kalean kokatuko diren txotxongiloak egiteko eta makillaje tailerrez gozatu ahal izango dute. Eguna amaitzeko, Txotxongilo-Antzerkiaren II. Gala ospatuko da. Bertan UNIMA Euskal Herria elkartearen zenbait taldek parte hartuko dute. Azkenik, igandean, ikuskizunak 11:30ean hasi eta 20:00etan amaituko dira.
Txotxongilo Egunaren bosgarren edizioa ospatuko da ostiraletik igandera bitartean Itzubaltzeta / Romo eta Areetan. Ekimen honek txotxongiloaren mundua du ardatz nagusia eta UNIMA Euskal Herria elkarteak antolatuta dago, Getxoko Kultur Etxearen laguntzaz. Hiru egunetan zehar, hainbat ikuskizun eskainiko dira, euskaraz eta gaztelaniaz, 14 antzerki-talde profesionalen eskutik. Antzezkizunetan txotxongiloak maneiatzeko zenbait teknika erakutsiko dituzte. Halaber, jarduera mordoa izango da, besteak beste, haurrentzako tailerrak, hitzaldiak, erakustaldi bat eta txotxongilo-gala. Horiek guztiak Areetako Andres Isasi musika eskolan eta Xake plazan eta Itzubaltzetako Ibaiondo kalean, Santa Eugenia plazan eta San Jose Elizako areto nagusian egingo dira, eta sarrera doakoa izango da, antolakuntzako iturriek adierazi dutenez. Argazkian, nork bere txotxongiloa egiten iazko edizioan / Getxo.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun