Getxoko Udaltzaingoak matrikulak identifikatzeko eta txarto aparkatuta dauden ibilgailuak salatzeko sistema eramangarria estreinatu du gaur goizean Aiboako Udaltzain-Etxean, argazki eta informatika sistema hau daroan autoa kaleratzen. Sistemak 52.000 euroko kostea izan du eta bi argazki kamera ditu. Batak, zuri-beltzezko eta (gauez) infragorrizko argazkiak ateratzen ditu txarto aparkatuta (bai bigarren ilaran, bai elbarrituentzako aparkalekuetan edo taxi eta bus geralekuetan) dauden autoen matrikulak hartzeko. Bigarren kamerak, bereizmen handikoa dela, ibilgailuaren egoeraren eta dagoen inguruaren kolorezko argazkia ateratzen du. Sistemaren atalik berritzaileena da, Jardunean dagoen Getxoko alkate Iñaki Zarraoak azaldu duenez. Izan ere, matrikula baten argazkia bere elementu digitaletan, zenbaki eta hizkietan, banatzea ahalbidetzen duela, eta horri esker “Udaltzaingoaren datu basetik ibilgailuaren, bere jabearen, eta abarren gaineko informazioa atera daiteke”. Zentzu honetan, jarduneko alkateak nabarmendu duenez, beste Polizia batzuk ere ibilgailuen gaineko informazioa sartu ahal izango dute, nahi izanez gero, Getxoko Udaltzaingoaren datu basean.
Zarraoak esandakoaren arabera, “sistema berriaren helburua ez da isunen kopurua handitzea, baizik eta teknologi berriak Udaltzaingoaren zereginak arintzeko erabiltzea, honek beste lan prestuago batzuk egin ahal izateko, esate baterako, auzotarrak laguntzea. Egia da, halere, indarrean dagoen araudia betetzen ez duten gidarien aurkako neurriak ere hartu behar direla”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun