Herritarren aurrean garbitu dituzte arropa zikina ezkerreko alderdi guztiek eta horrela orain arteko negoziazioen zehaztasun gehienak ezagutu ahal izan dute auzokideek. Esate baterako, Juan Ignacio del Vigo zinegotzi berdeak Ezker Batuari eta, zehatzago, Juan Vicente Ojinagari leporatu dio Garairekin akordioetara heldu izana, besteei sostengua ukatuz eta EBk ez bilatuz Imanol Garairen jarraipena ziurtatu dutelakoan. Ojinagak ukatu du hori, baita atzo Berdeek 9etan burutu den txistukada iragartzeko jarritako karteletan idatzitako antzeko argudioak.
EAEk bere aldetik jakinarazi du mahai gainean jarri zuen guztia alternantzia bilatzeko: EAE, EB-Aralar, EA eta Berdeen udal gobernua, non alkatetza EAE eta EBren artean txandakatuko zuten, bakoitzak bi urtez aginte makila hartuta. Aukera hori, kide federalista bat Txilera joan denez eta EBk ez duenez ordezkatu, gaur ezinezkoa zen. Bestalde, Sologaistuak errua bota dio Eusko Abertzale Ekintza bere alderdi ohiari, bigarren indarra izan arren, EB den hirugarren indarrari zuzenean alkatetza ez ematearren, PSE-EEk sostengatuko lukeen gobernua egin ahal izateko.
Bestalde, Lakuako Hiruko Gobernuak eta PSE-EEk Bizkaian udal zerrendarik bozkatuenei gobernatzen uzteko egindako hitzarmenak eta ETAren su-etenaren amaierak ez dute lagundu ezkerreko gobernua osatzen.
Greban dauden Sopelako TAOren beharginak ere Udalbatzan izan dira, beren aldarrikapenak zabalduz. Alabaina, bahiz eta TAO ezarri zuen Garaik alkatetzan jarraitu, baliteke laster non lan egin ez izatea.
Garaik alkatetzan jarraitzeko "errua" norena den eztabaidatu dute gaur Sopelan
17 zinegotzietatik EAJren 5 botoak baino ez ditu jaso Imanol Garai orain arteko alkateak udal mandatari gisa mantentzeko, baina nahikoa izan du horrekin Udalbatzan isil eta goibel egon den alkateak. Ardura berriro bereganatuta, "egin dudan guztia herriaren onerako egin dut" esatera ailegatu da, ordainean inolako txalorik jaso gabe, jelkideez, ekintzaileez eta berdeez betetako udalbatza aretoan. Garairi kasu handiegirik egin gabe, bera agintean jarraitzearen arduraduna nor den bihurtu da Sopelako udaletxean bilkuraren gakoa. Imanol Garaik eta EAEko Guillermo Vio "Willi"k 5 eta 5 berdindu dute, Berdeek ekintzaileei emandako sostengua dela eta. Ondoren, Valentsin Sologaistua EAEko idazkari nagusia ohia eta PSE-EEko alkategaiak 2 botorekin eta EAko Leire Pinedok eta PPko Berta Rodriguezek boto banarekin gelditu dira. Ezker Batuko bi zinegotzik zuriz bozkatu dute, hirugarren bat Txilen dagoen bitartean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun