Esan bezala, ekimena txosna batzordean egindako hausnarketa luze baten emaitza da. Izan ere, iazko Larrabasterrako jaietan, (dakizuenez Sopelan egon zen egoeragatik bertako datuak ez lirateke errealak izango), 76.000 bat plastiko edalontzi erabili eta bota ziren (21.000 zurito, 35.000 kaña, 11.200 konbinatu eta 8.700 katxi) eta, gaur egun baso guzti hauek birziklagarriak badira ere, “txosnetan gauden Sopelako 14 elkarteok uste genuen beste urrats bat eman behar zela: zarama gutxiago sortzearena, nahiz eta birziklagarria izan”.
Edalontzien kopurua %90 jaitsiko da
Hortaz, eta aurten esperientzia piloto gisa abiatuko dutela, “berriz erabiltzeko 14.979 edalontzi bidez nahi ditugu ordezkatu bestela botako liratekeen 150.000 bat edalontzi arruntak”. Kopuru horretatik 11.475 basok 380 mililitro izango dituzte, zuritoak, kañak eta konbinatuak hartzeko erabiliko direnak, eta beste 3.504 katxiak izango dira.
Geroago Euskal Herrian egindako esperientzia ezberdinak ezagutu badituzte ere, beraien erreferentea Katalunia izan da. Bertan, “Bilboko Aste Nagusian ez bezala, edalontzi birziklagarriak baino ez dira erabiltzen txosnetan eta urteen poderioz jendeak normaltasunez hartu du ohitura hori”. Dena den, katalanek eduki ez dituzten hiru arazo aurkitu dituzte sopeloztarrek ekimena burutzeko: “lehenengoa, inguruan ez dugula lortu edalontzi horiek nork egin eta serigrafiatu eta hortaz, Kataluniatik inportatu behar izan ditugu basoak, horrek suposatzen dituen dependentzia, gastuak eta garraioari lotutako kutsadurarekin; gainera, ekimen autogestionatua denez (Katalunian erakundeek ordaintzen dituzte baso ekologikoak), Sopela eta Larrabasterrako txosnek 6.000 euro baino gehiagoko inbertsioa egin behar izan dugu; azkenik, ez dugu inguruan topatu era ekologiko baten bidez eta osasunerako baldintza guztiak betez edalontzi horiek nork garbitu eta, hortaz, nahiago izan dugu edalontzi horiek jai ostean batu baino eroslearen eskuetan uztea eta Sopela eta Larrabasterran ez ezik inguruko eta urruneko jai guztietan erabiltzen animatzea. Horrela, eta ekimena posible egiteko, edalontziak salgai izango dira txosna guztietan 0,50 eurotan baso balioanitza eta euro batean katxia. Ez da bestelako edalontzirik emango txosnagune osoan. Dena den, eta esperientzia piloto hau ondo irtetekotan, gure asmoa da datorren urtean jendeak edalontzi horiek bueltatu ahal izatea eta dirua berreskuratzea”.
Sopelako txosnek edalontzi ekologikoak erabiliko dituzte jai garbiagoak bultzatzeko
Sopela eta Larrabasterrako txosna batzordeak 15.000 edalontzi ekologiko jarriko ditu bihartik aurrera, San Pedro eta Karmen jaietan, sopeloztarren eta bisitarien eskura. Betitxe Saitua eta David Bustamante “Zuku” txosna batzordeko bozeramaileek azaldu dutenez, ekimen horren helburuak dira udalerriko jai garbiagoak nahi izatea, “ohiko gure jai ereduan sortzen den zarama” gutxitzea eta “gure erreferentea diren adin guztientzako jai herrikoi, parte-hartzaile, parekide eta euskaldunei gure ekarpen ekologikoa” egitea. Horrela, eta Berrizekin batera, Sopela Bizkaiko lehenengo herria izango da herriko jaietan edalontzi ekologikoak erabiltzen. Euskal Herrian biak ala biak Pasaia Antxoko San Fermin Txikiek irekitako bidetik abiatuko gara. Bestalde, egun bateko jaialdietan horrelako ekimenak ugaltzen ari dira Euskal Herrian, guztion onerako. Argazkian, txosna batzordeko kide bat baso ekologikoen berri ematen duen kartel bat jartzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun