Urdulizko Ezker Batuaren zinegotziak dimititu egin du
2007ko abu. 8a, 22:00
Michael Mieves, Espainiako Alderdiaren Legeari esker bada ere, Ezker Batua Berdeak-Aralar koalizioak Urdulizen lortutako zinegotzi bakarrak dimititu egin du alderdi federalistak jakinarazi duenez. Ezker Batuak pasa den uztailaren 28an zabaldutakoaren arabera, Mievesek ez dio karguari uko egin Eusko Abertzale Ekintzari legokiokeen ordezkaritza ahalbidetzeko, baizik eta Urdulizen lehenengoz eta Sopelan geroago "'lapurra izatea' leporatzen dioten mehatxuzko kartel iraingarriak agertu ostean". Era berean, Madrazoren alderdiak dio Michael Mieves "auzokideek aukeratu zutela pasa diren udal hauteskundeetan" eta salatu du kartel horietan zinegotzi ardura EAErentzat izatea aldarrikatzen dela. Era berean, nabarmendu dute Mieves "jazartua" ikusi duela bere burua, lagunena eta senideena eta hori dela eta uko egin diola zinegotzi ardurari. Koalizioko bi alderdiek Mievesi begirunea eta babesa agertzeaz gain, koalizioan zein desagertutako TAOren aurkako plataforman egindako lana goraipatu dute. Alderdiek ez dute oraingoz argitu Mieves ordezkatuko duten ala ez. Urdulizen, EAJk gehiengo osoa dauka 6 zinegotziekin, EAk 2 ditu eta PSE-EE, PP eta EB-B / Aralarrek bana. Azken bi horiek Espainiako Alderdien Legeari esker.Salaketa ildoa jarraituz, Ezker Batua Berdeak alderdiak gertatutakoa "behartzetzat eta mehatxutzat" jo du eta "beldurrezko diktaduren jarduerekin" parekatu du, "erakundeetan euskal gizartearen zati bat ordezkatuta egotea ekiditen duen Alderdien Lege injustuaren aurka lerrokatzera eta salatzera eramaten gaituen EB-B / Aralarrek defendatzen dugun elkarrizketa jarraituaren praktika demokratikoaren aurkakoa", gaineratuz. Era berean, gogoratu dute Ezker Batua Berdeak alderdiaren kideek Abertzale Sozialisten zerrendak aurkeztu ahal izan zitezen bere sinadura eman zutela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun