Getxoko Bilgune Feministak zabaldutako oharra:
Azken urte honetan aldaketa handiak ematen ari dira gay, lesbiana eta transexualen eskubideei dagokionean. Baina ezin dugu arreta jaitsi, legeek hainbat eskubideren aitortza helburu badute ere, aniztasunaren errespetutik oso urrun aurkitzen garela adierazten diguten datu eta gertaerak ditugu egunero.
Familia eta beronen egitura heterosexualaren bidez banatzen eta antolatzen ditu rolak patriarkatuak, berau “normala” eta beste guztia “desbiazioa” dela jendarteari muinetaraino sartuz. Erlijioak eta instituzioak ere arau bihurtu duten normaltasun honen atzetik mugitu dira. Arau hausle hauek jendartetik aparte, ezkutatuta bizi behar izan dute beraien sexualitatea eta egun egoera ez da uste dugun bezain beste aldatu. Ikastetxeetan oraindik ere, bere sexuarengandik espero ez diren jarrera maskulino edo femeninoagoak izateagatik baztertuak diren ikasleak asko dira; eta hau adibide sinpleenetakoa izanik, ondoren jendartean ematen diren jarrerak are bortitzagoak izaten dira.
Aukera sexual guztiek behar dute bere tokia jendartean. Arau mugatzaileetatik haratago joan eta jendarte anitza, oztoporik gabea eratzeko ardura dugu guztiok, norma heterosexualarekin amaitzekoa. Gure aukera sexuala momentuan dena izanda ere askatasun osoz bizitzeko eskubidea guztiok ez dugun eskubide bat da. Emakume/gizon=femenino/maskulino genero dikotomiarekin amaitzeko beharra aldarrikatzen dugu jendartean. Genero eta sexuen arteko bereizketekin amaitu eta pertsona guztiak era berean baloratzeko ordua da, bere jarrera ezaugarri sexualak direnak izanda ere. Hau dugu sexuen eta rolen aferarekin amaitzeko era.
Azkenik, ezin gara ahaztu lesbianen arazo, behar eta eskubideekiko mugimendu feministatik izan dugun utzikeria. Gu geu ere arau sexualen aferan aniztasuna kontuan hartu gabe ibili izan gara urte luzeetan zehar. Bada ordua zatiketekin etxetik bertatik amaitzekoa. Horregatik dei egiten diegu feminista, emakume eta aurrerakoi sentitzen den orori ekainaren 28an egingo diren mobilizazio eta ekimen desberdinetan parte hartzera.
Gay, lesbiana eta transexualen aldeko biharko ekimenekin bat egitera deitu du Getxoko Bilgune Feministak
Nahiz eta aurrerapausuak ematen ari direla aitortu, oraindik orain, gay, lesbiana eta transexualek bazterketa pairatzen dutelakoan dago Getxoko Bilgune Feminista. Hori dela eta, "genero eta sexuen arteko bereizketekin amaitu eta pertsona guztiak era berean baloratzeko ordua" dela aldarrikatu du erakundeak, "bere jarrera ezaugarri sexualak direnak izanda ere". Ekainaren 28ko Gay, Lesbiana eta Transexualen Eskubideen Aldeko Eguna autokritika egiteko ere balio izan dio erakunde feministari: "Ezin dugu ahaztu lesbianen arazo, behar eta eskubideekiko mugimendu feministatik izan dugun utzikeria. Gu geu ere arau sexualen aferan aniztasuna kontuan hartu gabe ibili izan gara urte luzeetan zehar. Bada ordua zatiketekin etxetik bertatik amaitzekoa", adierazi dute. Gauzak horrela, biharko mobilizazio eta ekimenetan parte hartzera deitu dute feminista, emakume eta aurrerakoi sentitzen den oro. Argazkia: Gaztesarea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun