Marian Perez del Rio algortarra larunbat honetan, ekainak 30, kalera irtengo da, 15 urte preso egin ondoren. Uribe Kostako Amnistiaren Aldeko Mugimenduak Etengabe Etengabe bitakoraren bidez aurreratutakoaren arabera, Martutene espetxetik goizean irtengo dela esan diote, 9:00ak inguruan. Ondoren, seme-alaba eta familiarrekin bildu eta Txetxu Fernandez bere senarra bisitatzera joango da Burgoseko espetxera. Bisita 17:30ean jarrita daukate bertan. Gero, 21:00etan harrera egingo diote Portugaleten eta 22:00etan Leioako gasolindegian. Ondoren, Algortako Amnistia tabernan harrera ekitaldia egingo zaio: aurreskua, bertsolariak, brindisa… eta argazkia kentzea. Ongi etorri ekitaldia noiz egingo zaion oraindik zehaztu gabe dago. Bestalde, "Euskal presoak Euskal Herrira" lelopean, hileko azken ostiraleko elkarretaratzeak egingo dira etzi. Irudian, Itzubaltzeta / Romon pasa den irailaren 22an hainbat solidariok egindako ekintza.
"Orain espetxe zigorra beteta irtengo da kalera, legediaren aplikazio zuzenaz lehenago ere irten behar bazuen ere. Bitartean Txetxu bere senarrak ez dauka oraindik irteteko datarik ere, Marian bezala kalean behar zuen arren", azaldu du errepresioaren aurkako erakundeak. 1992ko maiatzaren 12an atxilotu zituzten biak, Barrikako euren etxean. Espetxeratu zituztenean hiru seme alaba txikiak utzi zituzten kalean, amamarekin bizi izan direnak. Carabanchel, Brieva, Langraitz eta Logroñoko espetxeetan izan ondoren Marian 1999ko irailean eraman zuten Martutenera. 2003ko hasieran kalera irten zen baldintzapeko askatasunean, baina fiskalak errekurritu egin zuen eta urte bat beranduago itzuli zen espetxera berriro.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun