Ezinduentzako erraztasunak izango dira udan Ereaga eta Astondo hondartzetan
2007ko uzt. 2a, 14:56
Mugitzeko zailtasunak dituzten lagunek erraztasun handiagoak izango dituzte udan zehar Gorlizko Astondo eta Algortako Ereaga (argazkian) hondartzetara joateko, 2004tik Gorlizen eta 2005etik Algortan udaro egiten den Hondartza denontzat egitasmoari esker. Gaur eta irailaren 1era bitartean, asteko egun guztietan eta goizeko 11etatik arratsaldeko 7etara, mugitzeko zailtasunak dituzten pertsonek ere gozatu ahal izango dute hondartzaz, horretarako hainbat laguntza tekniko izango dutela: aldagela bereziak, dutxarako aulki berezia eta zortzi makulu egokituak, arropaz aldatzeko zein hondartzan eta uretan mugitzeko launa begiraleen laguntza pertsonala, eta lehorrean zein uretan erabiltzeko moduko 7 gurpil-aulki (4 Gorlizen eta 3 Algortan).Hondartza denontzat egitasmoa 2004an sortu zuten Bidaideak Euskal Elbarrituen Elkarteak eta Heldu elbarritasuna duten pertsonak batzen dituen federazioak, eta dagoeneko laugarren ediziora heldu da. Uribe Kostan ez ezik, Zierbenako La Arena eta Lekeitioko Isuntza hondartzetan ere egiten da, toki horiek kokapena, irisgarritasuna eta demografiagatik aukeratu dituztela. Egitasmoak aurten 3.200 laguni arreta egitea aurreikusten dute eta horretarako 55.000 euroko inbertsioa egin dute, BBKren eta Bizkaiko Foru Aldundiak zein lau udalek finantzatuta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun