Romano (bateria), Sclavis (klarinetea) eta Texierren (kontrabaxua) musika-abentura 1990an hasi zen, Guy Maurette "Jazz souls les manguiers" egitasmoaren sortzaileak Afrikan frantses musikarien bira antolatzea erabaki zuenean. Hiru astez, erdialdeko Afrikako sei herrialdetan barrena aritu ziren, arrakasta handiz. 1995ean, birako oroitzapen onak berreskuratzearren, taldeak diskoa atera zuen, musikari bakoitzaren hainbat konposizio originalekin. Hiru urte geroago, esperientzia hori berriztatzea erabaki zuten, eta Afrikako ekialde eta hegoaldean zehar abiatu ziren. Taldearen musika herrialde desberdinetako giroz blaituta dago, musikarien lana etengabe bilakatzen ari dela eta kultur truketik elikatzen dela erakutsiz.
Voyage Quartet
Hirukote europarraz gain, Voyage Quartet taldea jardungo da, Juan Pablo Balcazar musikariaren azkeneko egitasmoa, hain zuzen ere. Proiektua 2005ean sortu zen, Bogota bere sorterria eta Bartzelona adopzio hiriaren arteko musika bidaia gauzatzeko eta horien isla diren bi errealitateak musika kontzeptu bakarrean uztartzeko.
Bestalde, Talde Lehiaketa abiatuko da Thinktank talde holandarraren eskutik. Laukote hori Hagako Erret Kontserbatorioan sortu zen, eta musika moldakor eta ausarta sortzeko helburua duten lau artista gazte biltzen ditu. Ardatz nagusia jazz tradizionala hartu eta soinu garaikideekin eta mendebaldeko herri musikarekin nahasten dute Thinktankeko kideek.
Jam saioak
Halaber, bederatzigarren urtez jarraian, aurten ere, Getxoko Jazzaldian jam saioak egingo dira, Algortako The Piper"s Irish Puben, Biotz Alai plazako kontzertuak bukatutakoan. Gauerdira aldera, publikoak jazz onenaz gozatzen jarraitu ahal izango du, giro apartan eta lasaian. Bost gauetan zehar, jazz zaleek jam session bikainez gozatzeko aukera izango dute. Saioetan oinarrizko talde bi izango dituzte, eta, horiei, egunero artista berriak gehituko zaizkie --batzuk, jaialdiko parte-hartzaileak--, eta erritmo guztiz desberdin eta orijinalak eskainiko dituzte.
Getxoko XXXI. Nazioarteko Jazzaldia asteazken honetan abiatuko da, eta Aldo Romanok, Louis Sclavisek eta Henry Texierrek osatutako hirukotea (argazkian) izango da eguneko protagonista nagusia. Hirukoteak jazza eta doinu etnikoak uztartuko ditu Algortako Biotz Alai plazan, 22:30etik aurrera. Gainera, beste bi saio egongo dira bihar: Hirugarren Milurtekoa atalean Juan Pablo Balcazar Voyage Quartet arituko da, Getxo Antzokia plazan, 19:30ean; eta Talde Lehiaketan, Thinktank laukoteak joko du, Biotz Alai plazan, 21:30etik aurrera, antolatzaileek jakinarazi dutenez. Bestalde, Rob Espino & Friends From New Orleans taldea jardungo da Getxoko kaleak girotzen. Azkenik, Algortako Satistegi kafean Fernando Barcena argazkilariaren erakusketa egongo da ikusgai uztailaren 19ra arte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun