Gizon bat atxilotu dute Sopelan larderia erabiliz sakelako telefono bat lapurtu duelakoan
Ertzaintzak JS.M.A. 42 urteko gizonezkoa atxilotu zuen atzo arratsaldean Sopelan, larderia erabiliz lapurreta delitua egin izana egotzita. Eusko Jaurlaritzako Herrizaingo Sailak zabaldutako bertsioaren arabera, gertakarien egileak mutil adingabe bat beldurtu zuen eta sakelako telefonoa ostu zion. Telefono hori barruko arropen artean ezkutatu zuen, baina identifikatzen ari zirela jo egin zuen. Gertakariak metroan hasi ziren, Indautxu eta Larrabasterra arteko bidean. Gizonezko bat azken geltoki horretan jaitsi eta hondartzara joateko autobus batera igo ziren bi adingaberen atzetik abiatu zen. Ibilgailura igo zenean, pertsona hori gazteetako batengana joan zen eta sakelako telefonoa emateko agindu zion. Biktima, orduan, beldurtu egin zen; izan ere, gertakarien egileak esku bat poltsa batean ezkutatu zuen, arma zuri bat eraman zezakeela erakusteko. Jarraian, gaizkilea autobusetik jaitsi zen eta ihes egin zuen.
Larderia erabiliz egindako lapurretaren berri izan eta berehala, ertzain patruila auto bat toki horretara joan zen eta lekukoek emandako datuekin bat egiten zuen pertsona bat ikusi zuen, Berango bidean. Identifikatzen ari zirela, ertzainek sakelako telefono bat (susmagarriak berea zela esan zuen) eta, eskuko poltsa batean gordeta, bi aizto (bat, 21 zentimetroko xafladuna) eta bihurkin bat atzeman zizkioten. Ebidentzia horien aurrean eta pertsona hori lapurretaren egilea zenaren susmoa hartuta, agenteek biktimaren telefono zenbakira deitu zuten. Orduan, telefono horrek, susmagarriak barruko arroparen azpian gordetzen zuenak, jo egin zuen eta agerian utzi zuen bera zela larderia erabiliz egindako lapurretaren egilea. Azkenean, ertzainek JS.M.A. Bilboko 42 urteko bizilaguna atxilotu eta, behin polizi eginbideak bukatutakoan, epailearen esku utzi zuten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun