Iker Beristain Espainian epaitzea aztertzen ari dira

Erabiltzailearen aurpegia Ukberri 2007ko uzt. 9a, 22:41
Iker Beristain Gutierrez "Beris" algortarraren (argazkian) kontrako euroagindua eman du Baltasar Garzon Espainiako Auzitegi Nazionaleko epaileak, 20 minutos egunkariak zabaldutakoaren arabera. Hala, Frantziako Ministerio Publikoa biltzen ari den informazioa esku artean duenean, Fiskaltza espainiarra aipatu atxilotze agindua zabaldu edo zaintzako epaileari jurisdikzio-eskumena eskatzeko agindua ematea aztertzen ari dela adierazi du agerkariak, iturri judizialak aipatuz. Azken erabaki horren arabera, Espainian epaituko lukete Beristain. Bitartean, Fleuryn dago espetxeratuta Algortako gaztea, ostiralean bertan, Laurence Le Vert epailearen aurrean egon ondoren, Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez.
Frantziako Poliziak Saint Thibault-des-Vignesen (Parisetik gertu, 30 bat kilometrotara ekialderantz) atxilotu zituen joan den astelehenean Iker Beristain eta Liher Rodriguez. Berri agentziek, iturri judizialak aipatuz hedatu dutenez, "antolatutako erakunde batentzat arma bidez lapurreta egitea" eta "helburu terrorista duen gaizkile talde bateko kide izatea" leporatu die epaileak biei eta egun horietan Frantzian atxilotutako beste hiru euskal herritarrei. "Dokumentu administratibo faltsuak izatea, idatzi publiko faltsuak antolatutako erakunde batentzat erabiltzea eta auto matrikula faltsuak erabiltzea" ere egotzi die epaileak. Beristain eta Rodriguezi "lehen eta laugarren mailako arma eta munizioak eduki eta garraiatzea" ere leporatu die, aipatutako iturrien arabera, baita "dokumentu publikoak faltsutzea" ere.
Politika Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun