Getxoko Udalak joan den ekainaren 15ean martxan jarritako doako zerbitzua 14 eta 72 urte arteko 530 lagunek erabili dute orain arte. Horietariko batzuek gainera behin baino gehiagotan mailegatu dute bizikleta eta, horregatik, zerbitzua, guztira, 810 aldiz erabili egin dute herritarrek, Imanol Landa alkateak gaur ezagutzera eman dituen datuen arabera. Ekimena datorren irailera arte egongo da abian, proba gisa, Behargintza enplegu zentroaren bitartez, horretarako Ekobizi enpresa aukeratu duelako. Horrek lana topatzeko zailtasunak dituzten pertsonekin egiten du lan eta Bilbon eta Barakaldon ere eskaintzen du zerbitzu berbera. 262 lagunek Ereagako turismo bulegoan hartu dute bizikleta eta 278k Areetako Bizkaiko Zubiaren ondoan dagoen turismo bulego Mugikorrean. Horietatik, erdiak getxoztarrak ziren. Argazkian, besteak beste, Imanol Landa alkatea eta Keltse Eiguren alkateordea mailegatutako bizikleten gainean / Getxo.net.
Imanol Landa alkateak "oso positibotzat" jo ditu bizikletak mailegatzeko zerbitzuaren erabileraren datuak eta, horren bitartez lortu nahi diren helburuak hauek ere direla azpimarratu du: zailtasunak dituzten laguni lana topatzen laguntzea, udalerriko ibilide turistikoak sustatzea eta bizikletaren erabilera garraiobide alternatibo gisa bultzatzea. Zerbitzuaren ordutegia 10:00etatik 14:00etara eta 16:00etatik 20:00etara da. Udal agintariak udalerrian bizikletaren erabilera sustatzeko duen interesa nabarmendu du eta hori lortzeko esan du, besteak beste, kiroldegietara eta ikastetxeetara heldu ahal izateko bidegorriak egingo dituztela, baita bizikleten erabilpenerako egokiak diren hiri hornigarriak jarri ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun