Uribe Kostako Zerbitzu Mankomunitateak 2006an egin zuen etxeko konpostajearen inguruko lehenengo kanpaina, eta orduko hartan 520 konposgailu banatu ziren. Kanpaina horrek eduki zuen arrakasta eta dagoen itxaron zerrenda kontuan hartuta, beste kanpaina bat egitea erabaki dute. Oraingo honetan beste 100 konpostagailu banatuko dira. Hartara, izena emateko orri (pdf) bakoitzari kontrol‑zenbaki bat emango zaio sarrera‑erregistroan, eta orriak jaso diren hurrenkera berean banatuko dira, Mankomunitateko arduradunek zehaztu dutenez. Beraz, ondoren jasotzen diren eskariak deialditik kanpo geratuko eta itxaron zerrendara pasatuko dira. Gehienez ere urriaren 31ra arte hartuko dira eskari orriak, eta egun horretatik aurrera ez da besterik onartuko. Orriok posta arruntez (Gatzarriñe, 4 - 48600 Sopela), posta elektronikoz (kosta[abildua]uribekosta.org edo agenda21[abildua]uribekosta.org), telefaxez (946 762 872) edo eskuz entregatu daitezke Mankomunitatearen egoitzan. Argazkian, Uribe Kostan ezezik, Bizkaiko mankomunitate gehiagotan ere egin dute konpostajeari buruzko kanpaina, Txorierri tartean.
Kanpainan parte hartzeko baldintzak hauexek dira: Mankomunitate honetako zazpi udaletako batean, hau da, Barrika, Berango, Gorliz, Lemoiz, Plentzia, Sopelana edo Urdulizen erroldatuta egotea; konposgailua jartzeko lur‑eremua izatea; konpostajeari buruzko hitzaldi teoriko‑praktikora joatea; erregistro batean jasotzea zenbat gai organiko bota den konposgailura eta handik zenbat konpost lortu den; eta gai organikoen edukiontzietara inausketa‑hondarrik ez botatzeko konpromisoa hartzea, hurrenez hurren.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun