Pako Gallaga Eusko Abertzale Ekintzako militante historikoa eta Etxerateko partaidea abuztuaren 2an hil zen gaixotasun luze baten ostean. Jabi bere semea larunbatean Kordobako espetxetik atera zuten aita ikusi ahal izateko, "baina ezin izango zuen aita bizirik ikusi", tamaldu du errepresioaren aurkako mugimenduak. Hileta elizkizunak hurrengo egunean, arratsaldeko 8etan, egin ziren Algortako Erredentore elizan. Ertzainek Jabi Gallaga ordu bete lehenago ekarri eta sakristian sartu zuten. "Ingurua kalez jantzitako poliziez josita egon zen eta Brigada Higikorreko hiru furgoi inguratu zuten eliza, metrailetaz armatuta. Eliza barruan ere Jabi ertzainez inguratuta egon zen eta ez zuten ama baino beregana hurbiltzen utzi. Elizkizunak amaitzerakoan familiarrekin izan zen une labur batez, baina halako batean ertzainek egonaldia amaitutzat eman eta eraman egin zuten", Etengaben azaldu dutenez.
Espainaratzea
Azkenik, Lexuri Gallastegi berangoztarra atzo, abuztuak 9, eraman zuten Madrilera Espainiako Auzitegi Nazionalean epaitzeko. Frantzian espetxe zigorra betetzen ari da, eta epaiketa amaitu ostean berriro bertara eramango bide dute. Bitartean, Gallastegirekin batera atxilotu zuten Manex Zubiaga Frantzian jarraitzen du, "akusazio eta espetxe zigor berberak dituzten arren", jakinarazi du Uribe Kostako Amnistiaren Aldeko Mugimenduak.
Uribe Kostako Amnistiaren Aldeko Mugimenduak Etengabe bitakoraren bitartez jakinarazitakoaren arabera, igandean, abuztuak 12, marmitako egunean, elkartasun herri bazkaria egingo da Algortako Portu Zaharreko jaietan. Bazkaria txosna gunean izango da, 15:00etan, eta menua, zelan ez, marmitakoa izango da. Txartela aldez aurretik hartu daiteke txosnan. Egunotako festa giroak, ordea, ez du kartzeletako berri jarioa eten. Anjel Figueroa preso algortarrak uztailaren 26an bertan behera utzi zuen lau egun lehenago hasitako gose eta egarri greba. "Langraitzeko zuzendaritzak ziegan beste preso politiko batekin jartzea onartu zuen, horrela neurri batean Anjelek exijitzen zituen bizi baldintzak onartu zituelarik", azaldu du errepresioaren kontrako mugimenduak. Bestalde, aitari bakarrik eman diote Iker Beristain bisitatzeko baimena. Algortako gaztea uztailaren 3an atxilotu eta uztailaren 6an Fleuryn espetxeratu zuten. "Hala ere, orain arte ez du etxekoen bisitarik egon da eta aste honetan Le Vert epaileak bisitak egiteko baimena aitari bakarrik eman dio, anaia eta neska laguna bisitak egiteko aukerarik gabe utzita ordea", salatu zuen joan den astean AAMk. Irudian, Pako Gallaga zena semearen argazkia eskuan / Etengabe.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun