Ohi bezala, azoka 10:00etan hasi da baina, ordu hori baino lehenago, lehenengo bisitariek gain-begirada ematen hasi ziren eguneko lehenengo erakusketak egiteko asmotan. Handik ordubetera, publikoak azokaren hiru salmenta guneak bete egin zituzten: San Nikolas, Getxo Antzokia eta Biotz Alai abesbatza plazak, hain zuzen ere. Horrela, 14:00ak arte, etengabe egin dira salmentak. Bestalde, bertoko trikitilari taldeei eta aurten jarri diren hiru txosnei esker, jai giroa nagusi izan da azokan. Hau guztia, eta goizean izan den eguraldi ona ezinbestekoak izan dira giro itzela lortzeko.
Produktuen aniztasuna eta kalitatea izan dira aurten ere San Lorentzoko Azokaren ezaugarri nagusiak. Barazkiak, txerrikiak eta ahatekiak, lekaleak, txakolina, euskal pastela, tradiziozko okintza, gozokiak, landareak eta loreak, gaztak, eztia eta beste hainbeste produktuak egon dira salgai merkatuan. Ohikoa denez Euskal Herri osotik etorritako ekoizleek etorri dira Algortara bere salgaiekin.
Lehiaketak
Eguerdian ekoizle askok espero zuten momentua heldu da, epaimahaiak barazki, landare eta gazta lehiaketen emaitzak jakinarazi baititu. Aurten, barazki lehiaketan, Urdulizko Adela Andikoetxeak lortu du lehenengo saria, Barrikako Jose Ramon Intxaurtietaren eta Mª Angeles Andikoetxea bere ahizparen aurretik. Landare lehiaketari dagokionez, Urdulizko Maria Jesus Viteri izan da garaile. Larrondoko Emilio Mateosek eta Barakaldoko Enedina Madariagak eskuratu dute bigarren eta hirugarren saria, hurrenez hurren. Azkenik, gazta lehiaketan, Ricardo Murias (Muskiz) atera da garaile, Amelia Jauregiren (Gabiria) eta Segundo Meaberen (Gujuli) aurretik. Gainera, aurten sari berezia eman zaio Getxoko barazki-ekoizlerik onenari, Jose Antonio Zabalari, hain zuzen ere.
San Lorentzo azokak emaitza "itzela" lortu du, guztira 19.000 bisitari izan baitira goiz osoan zehar Algortan, Getxoko Kultur Etxeak zabaldutakoaren arabera, Maria San Gil, Antonio Basagoiti eta Marisa Arrue buruzagi popularrak tartean zirela. Iaz ez bezala, lasaitasuna izan da nagusi. Aurtengo ekitaldian Euskal Herri osoko 80 bat ekoizlek parte hartu dute eta 100 postu egon dira. Antolatzaileen arabera, azokak duen salmenta kopuruak eta urtero jasotzen duen jendetzak argi erakusten dute ekitaldi hau derrigorrezko hitzordua dela baserriko produktuak erosi nahi dituen ororentzat. Ohikoa denez, San Lorentzoko jaia Biotz Alai abesbatzak eskainiko duen kontzertuaren eskutik amaituko da gauez. Argazkian, igazko azokako artxibo irudia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun