Bigarren eskuko liburu azokaren dirua Madagaskarreko garapen proiektu bati eman dio Getxoko Udalak
Getxoko Udalak Algortako aita trinitarioek Madagaskarren duten proiektu bati eman dizkio uztailean Getxoko Kultur Etxeak burutu zuen II. Elkartasuneko Bigarren Eskuko Liburu Azokan bildutako 6.058 euroak. Diru-emate ekitaldia pasa den asteazkenean, irailak 5, egin zuten Algortako Villamonte kultur etxean Imanol Landa alkateak eta trinitarioen hiru ordezkarik. Bertan, Landak txeke erraldoia eman zien Felipe Bustinza Madagaskarreko proiektuaren koordinatzailea, Martin Barayazarra Trinitarioen Ordenako aitaburua eta Jule Urrutia Algortako Trinitarioen kooperazio arduradunari. 6.058 euroak Madagaskarreko Tsiroanomandidy lurraldeko Ambohidahy-n herrian abeltzaintza eta nekazaritza arloetan heziketa profesionala emateko zentroa eraikitzeko baliatuko dutela esan zuten aita trinitarioek. Alkateak, berriz, txekea eman eta gero, beste behin ere, laguntza jaso duen bezalako proiektuen bidez “Algortako aita trinitarioek, eta Getxoko auzokideek orokorrean egiten duten beharraren garrantzia” nabarmendu eta goratu zuen. Iaz Saharara bideratu zen liburu azokan lortutako dirua, 6.000 bat euro. Argazkian, Imanol Landa alkatea eskuman, ordezkari trinitarioei taloi ematen / Getxo.net.
Bustinzak gogoan hartu zuen Madagaskarren erabiltzen dituzten abeltzaintza eta nekazaritza erak: "lan horretarako erabiltzen duten metodoa tradizionala da, gurasoek seme-alabei igorri dietena”, azaldu zuen bertan 47 urte lan egin ostean jasotako esperientziaz. Horrez gain, misiolariak Madagaskarreko Gobernuak “bertako herritarrei laguntzeko erakusten duen pasibitatea” nabarmendu zuen. Orain arte, misiolari trinitarioek ganaduaren arraza hobetzeko lan egin dute bertan, ganadua zebuekin zekortzen, eta horrez gain lurrari etekin handiagoa ateratzeko ere egin dute behar, izan ere lurralde horretan arroza da oinarrizko elikagaia eta baita elkartrukerako elikagaia ere. Proiektu berri horren helburua, Felipe Bustinza Aitak azaldu zuenez, “bigarren hezkuntzako zentro bat eraikitzea da, bertan gazteek abeltzaintza eta nekazaritza arloetan beharrezko heziketa jaso dezaten”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun