![](http://farm4.static.flickr.com/3071/2924249055_758cea085e_m.jpg)
Leioako Udaltzaingoak 37 urteko A.A. gizonezkoa atxilotu zuen atzo Pinueta auzoan, bere bikotekideari edalontzi batekin erasotzea egotzita. Tokiko poliziak zabaldutako bertsioaren arabera, 20:30ean, auzotar batek Udaltzaingoari deitu zion bere kaleko taberna baten barruan borroka ematen ari zela esanez. Patruila auto bi bertaratu ziren eta emakume bat aurkitu zuten tabernaren kanpoaldean, M.V.G.C. 33 urtekoa eta leioaztarra, negarrez eta burua zein eskuak odolez beteta zituela. Anbulantzia bati dei egin ostean, emakumea bere bikotekideak eraso zuela onartu zuen, polizia iturriek diotenez: urte bi omen daramatza berarekin bizitzen, eta aspalditik tratu txar psikologikoak pairatzen zituela adierazi zuen. Dena den, biktima salaketa jartzeari uko egin zion “alferrikakoa” izango zelakoan. Horretaz gain, ustezko erasotzailea bere etxetik bi metrotara dagoen taberna batean lan egiten duela aipatu zuen. Atxiloketaren ostean, gizona epailearen esku jarri du Udaltzaingoak tratu txarrak egotzita. Aurrekariak ei ditu antzeko delituengatik. Argazkian, emakumeenganako biolentziaren kontrako elkarretaratzea Algortan.