Bilboko EDE Fundazioak eta Itzubaltzeta / Romoko Ziztu Bizian eta Algortako Eskubeltz eskaut taldeek kudeatuko dute Getxoko Udalak esleitu duen Areetako udal ludotekaren zerbitzua 2008an, ekimen horren lehenengo urtean, Eskubeltz elkarteak jakinarazi duenez. Aipatutako hiru talde kristau horiek Aisibizia Getxoko Aisialdiaren Taldeak elkartea osatu zuten zerbitzuagatik lehiatzeko eta dagoeneko iragarri dute beren helburua lortu dutela. Beste sei taldek zerbitzua kudeatzeko proposamen bana aurkeztu zuten, tartean Bizarra Lepoan Getxoko euskara elkarteak eta Urtxintxa astialdi eskolak. Udalak abuztuan kaleratu zuen zerbitzuaren 2008rako esleipen prozesua, gehienezko 58.000 bat euroko aurrekontua finkatuta. Dena den, lehiaketaren oinarrietan finkatzen da, kontratua beste urte batez luza daitekeela. Argazkian, Eskubeltz eskaut taldeak pasa den urriaren 6an ospatutako ikasturte hasierako irudi bat / Eskubeltz.
Ludoteka Areetako Eskoletako plazan, ohiko ipotxen plaza, egongo da, antzinako ehiztarien eta arrantzaleen elkarteko egoitzan. Zerbitzua 5 eta 12 urte arteko umeentzako egongo da zabalik, bi begiralek dinamizatuta, eta bere ordutegia, astelehenetik ostiralera bitartean, 17:00etatik 20:00etara izango da, bi txandatan: 18:30ak arte 5 eta 8 urte artekoentzat eta handik aurrera, 9 eta 12 urte artekoentzat. Ludotekaren zerbitzu publikoak helburu hirukoitza du: umeak aisialdian heztea, jolasen bitartez teknikak eta bitartekoak irakatsiz; Itzubaltzeta / Romoko eta Areetako umeen garapena sustatu, errespetua, bakearen kultura, justizia, elkartasuna, aukera berdintasuna eta partaidetza oinarritzat hartuta; eta aisialdiaren esparruan euskara biziberritzea. Udalak aurreikusita dauka beste zentro bat zabaltzea, Getxo eta Algortako gazteontzat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun