Ostegunean, jardunaldiak irekitzen, Portugaleteko Elai-Alai taldeko Orfeon Jarrillero abesbatza izango da. Orfeoi hori 1990 urtean sortu zen tradizio familiarreko musikari eta konpositorea zen Alfredo Cobos Reimundez portugaletetarraren ekimenari esker. Taldearen lehenengo urteetan Cobos zuzendari aritu zen eta, horren ondoren Fernando Aguadok hartu zuen lekukoa. Gaur egun, Orfeon Jarrillero orfeoiak gizonezkoen 35 ahots ditu eta bere errepertorioaren barruan besteak beste moteteak, abesti erlijiosoak, musika profanoa, habanerak, biribilketak, zortzikoak, operako piezak eta zartzuela herrikoienetakoak ditu baina, horiek guztiak gorabehera, euren espezialitate nagusia habanerak dira.
Bestalde, Marina Rossell itsas-abestien eta habaneren ahots handienetakoa da. 1976 urtean hasi zuen bere ibilbidean zehar artista katalanak hamabost bat lan argitaratu ditu. Ibilbide horretan Marina Rosellek oso ezagunak diren beste artista batzuekin abestu du, adibidez Georges Moustaki, Montserrat Caballe, Luis Eduardo Aute, Carlos Cano edo Pedro Guerrarekin, zein Tomatito gitarra-jole flamenkoarekin. Abeslari katalanak birak egin ditu Europan, Ameriketan eta Afrikan abestuz eta horietan ere arrakasta handia lortu du publikoaren artean.
Lehorreko habanerak
Amaitzeko, azken jardunaldian, Habaneras de Aguadulce taldea jardungo da Areetan. 1998 urtean sortu zenetik zazpikote horrek habanera ulertzeko era berria ekarri dio tradiziozko jenero horri, penintsularen itsasertzeko eta barrualdeko bere errepertorioko abestirik herrikoenei esker, baina baita lirika garaikideko konpositore espainiar eta hispano-amerikar handienen partitura konplexuei esker ere.
Gaztela, Herrialde Katalanak eta Euskal Herriko habanerak entzungo dira bihartik aurrera Areetan
Portugaleteko Elai-Alai taldeko Orfeon Jarrillero abesbatzak emango dio hasiera bihar, osteguna, Getxoko Udaleko Kultur Etxeak urtero antolatzen duen Habanera Jaialdiaren XXI. edizioari. Areetako Xake plazako oholtzan larunbatera arteko musika eskaintza aberasteko Herrialde Katalanetako Marina Rosell abeslaria arituko da ostiralean eta, biharamunean, irailak 15, Gaztelako Habaneras de Aguadulce taldea. Kontzertu guztiak 20:00etan hasiko dira eta, ohi bezala, sarrera doakoa izango da. Kontzertuez gain, aurten publikoak "Getxo eta itsasoa" argazki erakusketaz gozatzeko aukera izango du. Erakusketa jaialdiko esparruan kokatuko da eta bertan, itsasoari lotutako zenbait argazki egongo dira ikusgai. Halaber, beste nobedade bat egongo da aurtengo jaialdian: Itsas Azoka, hain zuzen ere. Besteak beste, azokan itsaskiak, bakailaoa, kontserbak eta oroigarriak erosi ahal izango dira Areetako Xake plazan igandera arte. Azokaren ordutegia honako hau izango da: 11:00etatik 14:00etara eta 17:00etatik 22:00etara (ostegunetik larunbatera). Igandean goizeko ordutegian baino ez da zabalduko. Argazkian, Marina Rosell izango da jardunaldietako emakume bakarra.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun