Urriaren 5era arte izango da udalerriko 17 gune publikoetan Getxophoto argazkigintza erakusketa, Begihandi elkarteak antolatuta, Getxoko Udalaren eta Bizkaiko Foru Aldundiaren laguntzaz. "Helburua espazio urbanoak erabilera kulturaletarako berreskuratzea da, bide batez, argazkigintza eta irudiarekin harremana duten ekintza desberdinak herritarrengana hurbilduz"; horrela azaldu du Imanol Landa alkateak. Getxophotok bi atal nagusi izango ditu: alde batetik, argazkiak egongo dira ikusgai aipatu guneetan (besteak beste fatxadetan, parkeetan, erakusleihoetan, plazetan, Algortako merkatuan eta Portu Zaharrarrean). Bestetik, gaur hasi eta irailaren 16ra bitartean, argazki jaialdia (erakusketak, proiekzioak, hitzaldiak...) egingo da Algortan, Jokin Aspuru Begihandiren eledunak adierazi duenez. Argazkian, Algortako metro geltoki sarreran jarritako irudia.
Erakusketak Punta Begoñan, antzinako hiltegian, Ereagako igogailuan, Manuel Gainza parkean, Satistegi plazan eta Amezti kalean kokatu dituzte, baita Euskal Herria, Basagoiti, Telletxe plaza edo Torrene kaleetako erakusleiho batzuetan ere. Halaber, obrak ikusgai egongo dira Algortako azokan eta kultur etxean, San Nikolas plazan, Getxo Antzokian, Portu Zaharrean eta Aixerrotan. Proiekzioak eta Bertsophoto saioa San Nikolas plazan egingo dira. Telletxe plazan jarritako karpa pean, berriz, lau erakusketa egongo dira, baita beste jarduera batzuk ere, besteak beste hitzaldiak. Horiei dagokionez, ondoko hauek izango dira: Mayu Mohanna argazkilariaren solasaldia, gaur bertan, Getxophotok Amezti kaleko 6 atarian duen egoitzan eta beste bat hilaren 14an, Alejandro Castellote erakusketaren komisarioak emana, Villamonteko kultur aretoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun