Astelehenean hasi eta gaur 18:30ean jarraituko dira Leioako Udondo auzoko jai laburrak. Ohiko txupinazo, meza, aurresku eta nagusientzako luntxa igarota, asteleheneko Los Cinco Bilbainos taldearen doinuek gaurko EH Sukarraren rockari, 23.00etan, eta Trikizioren erromeriari emango diete bidea, bihar gauean ska eta erromeria ere izango direla. Baina, Udondon badakite jaiak egunez ere ospatzen eta horren lekuko dira gaur 18:30ean hasiko diren haurrentzako jolasak edo beranduagoko haurrentzako animazioa eta txokolatada. Gainera, kontzertuaren atsedenaldian mozorro txapelketa eta karaoke lehiaketa egingo dute bi txosnetan.
Larunbatean, goizeko 10etan Udondoko nekazaritza azoka hasiko da, futbito lehiaketa baino bi ordu lehenago. Eguerdia pasata berriz aizkolarien Bizkaiko Open txapelketaren lehia izango da eta Leioako harrijasotzaileen eskolak erakustaldia egingo du. Kirolatik musikara salto eginez, 13:30ean musika poteoa egingo da eta ordu erdi beranduago Leioa Udal Musika Bandak kontzertua emango du. Ondoren, herri bazkaria egingo dute auzokideek eta bisitariek. Bazkalostea egina, V. Arrantza txapelketaren ordua izango da eta ostean, Gure Ohiturak eta Txikiak dantza taldeen alardea. 19:30ean kuadrilen arteko olinpiadei ekingo diete. 22:00etan Skaramuza ska taldeak joko du eta Unsain Anaiak izango dira ondoren erromeria egiteko. Ohiko atsedenaz baliatuko dira gazte udondoarrek olinpiaden finala burutzeko. Gauak, baina, amaiera emango die Udondoko jaiei.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun