Gasolina eta elektrizitatearekin dabilen autoa dauka Sopelako Udaltzaingoak
2007ko ira. 14a, 17:46
Sopelako Segurtasun arloak patruila-auto hibridoa, hau da, gasolinarekin ibiltzearekin batera, elektrizitatea ere erabiltzen duen kotxea erosi berri du, "ingurumenaren jasangarritasuna zaintzeko asmoz". "Gutxiago kontsumituz gain -5 litro 100 kilometroko- gutxiago kutsatzen du, bai alde akustikoan, bai isurtzen duen CO2 kopuruari begiratuta", azaldu zuen atzoko agerraldian Jose Landaluze Segurtasun zinegotziak. Autoaren kostuari dagokionez, "ezaugarri berdinak dituen beste ibilgailu batena bezalakoa" izan dela adierazi zuen udal agintariak: 28.000 euro inguru, Energiaren Euskal Erakundeak (EEE) emandako diru-laguntzaz ordaindua, argitu zuenez. Halabaina, zera azpimarratu zuen ondoren Landaluzek: "Kontutan hartu behar dugu oraingo honetan autoaren prezioa areagotu egin dela udaltzaingo-ekipamendua barne hartu izan duelako". Honda Civic Hybrid modeloko patruila-auto berria kaleetan zehar ibiliko da gehien bat, horregatik "ibiltzen egongo den denboraren %80 elektrizitatea erabiliko du", argitu dute. Argazkian, udal agintari eta udaltzainak patruila-auto hibridoa alboan dutela / Sopelana.net.Ekintza honek Udalak hasi zuen ingurumen sentsibilizazio-kanpainarekin -orain dela gutxi udalerriko hainbat etxeen teilatuetan eguzki-plakak ezarri baitziren- lotu dute tokiko agintariek eta Energiaren Euskal Erakundearekin adostutako hitzarmen baten emaitza da. Horrekin batera, auto hibrido bat erosten duenari Udalak zirkulazio zergaren %75 ordaintzen diola gogoratu zuen Landaluzek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun