Leioako Udondo gaztetxeak Filipinetako mugimendu libertarioarekiko informazio eta elkartasun eguna ospatuko du gaur. Jardunaldia 14:30ean hasiko da, Filipinetako sukaldaritzan oinarritutako herri bazkari vegano baten bidez. Ondoren, Asiako hego-ekialdeko mugimendu autonomoa eta anarkistari buruzko hitzaldia izango da 17:30ean, gazteleraz. Hitzaldiarekin tartekatuz, hainbat bideo proiektatuko dituzte, kartzela, errepresioa eta tortura oinarri hartuta eta Sagadako hamaikakoen kasuaren haritik tiraka. Era berean, Mindanaoko Katribu Media Activist taldeak ekoiztutako bideoak ikusgai egongo dira. Arratsaldeko 7etan, berriz, nazioarteko elkartasunari buruzko eztabaida egingo dute. BI ordu beranduago, berriz, Soli-jaia ospatuko dute DJ Malayoren eskutik, punk, new wave eta pasaden mendeko pop doinuak erabiliko dituena. Sortuko diren etekinak Filipinetako iparraldean jarduten duten infoguneak laguntzera bideratuko dira. Gainera, egun osoan zehar irla horietan piztutako borroken argazkiak eta kartelak izango dira ikusgai. Azkenik, ez da aipatu behar izango inguruan Udondo auzoak bere jaiak ospatzen dituela. Argazkian, Filipinetan aurtengo maiatzean egindako udal hauteskundeetarako abstentzio aktiboaren aldeko kartela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun