Leioa eta Erandio udalerriak kale musikarien lurraldea bihurtu dira atzotik, eta igandera arte horrela segituko dute, Sestao, Basauri, Ermua eta Zornotzarekin batera antolatu duten Musikale Kaleko Musikarien Nazioarteko Topaketaren zazpigarren edizioari esker. Udalerri hauetan, giro eta formatu anitzetako hamalau talde dihardute kaleetan zehar. 215 musikari horiek ikuskizun oso ezberdinak dituzte, zirku, musika eta bat-batekotasunetik Kubako son eta Brasilgo batukadaraino, antzerkia eta musika tartekatzen dutenak, tenoreak, mariatxiak eta fanfarreak ere badaudela. Taldeen sorburuak ere argi-ilun asko sor ditzake bakoitzak propio dituen erritmoak direla eta: Bali, Burkina-Faso, Herrialde Katalanak, Portugal, Galizia, Italia, Frantzia, Alemania, India, Mexiko, Hungria eta, jakina, Euskal Herria. Gaur arratsaldean O Pedron gaita taldea, Sokan afrikarrak eta bertako Trikileku taldea, 2002an sortua trikitia bultzatzeko, ibiliko dira Erandioko Altzaga auzotik 19:30ak eta 21:45ak bitartean. Beren ibilbidea polikiroldegian hasi eta udaletxe aurrean bukatuko da, Tartanga, metroko plaza, geltoki etorbidea, Jado, Ibarra eta Obieta igaro ostean. Leioan ere, arratsaldean zehar kale esanguratsuenek jasoko dituzte munduko musikarien doinuak. Argazkian, bihar Ondizen eta Astrabuduan joko duen Mac Jeara’s Band.
Bihar, igandea, Musikale ekimena bere amaierara helduko da, urtero legez, baina aurretik Ondizko Bakailao Lehiaketa gozotuko die bertaratutakoei. 13:00etan, kontserbatorioko eta musika eskoletako irakasleek osatutako Mac Jeara's Band taldea aurreko mendean New Orleansen zeukaten musika giroa zabalduko du eta arratsaldeko 6:30ean, berriz, Tetaclak frantsesak arituko dira. Erandiori dagokionez, goizeko 12etan Altzagako ibilbidea egingo dute Eurobig Band italiarrak, Tetaclak, eta Sinar Bulan & Gong Tirta indonesiarrak. Astrabuduan, kalejira 6etan hasiko da Portugalgo Coro Ausentes do Alentejo, Alemaniako Express Brass Band eta bertako Mac Jeara’s Band zortzikotea arituko direla.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun