Bi gazte atxilotu dituzte Algortan kolonia lapurtu dutelakoan
2007ko ira. 17a, 12:08
Getxoko udaltzainek bi gazte atxilotu zituzten ostiral goizean Algortako Telletxe kalean, Bilboko denda batean marka ezagunetako 65 kolonia ontzi bortxaz lapurtu izana leporatuta. Getxoko Udaltzaingoak jakinarazitakoaren arabera, udaltzainen patruila-auto bat Telletxeko kalean bigarren ilaran aparkaturik zegoen eta gidariaren atea zabalik zeukan turismo bat ikusi zuen. Autoaren inguruan lau gazte zeuden, haietako bat atari baterantz zihoana, eskuetan zerbait handia zeramala. Udaltzainek patruila-autoa geratzean gazteak korrika hasi ziren eta eskutan zeramatena bertan behera utzi zuten. Poliziak haien atzetik joan ziren autoan, Satistegi plazaraino. Bertan, autotik jaitsi eta oinez jarraitu zituzten banandu egin ziren gazteak. Haietako bat Satistegi plazan bertan atxilotu zuten eta beste bat Basagoiti etorbidean, azken biak ihes egin zutela.Gazteek atzean utzi zutena manta bat zen, barruan izen handiko marketako 65 kolonia ontzi zituena. Ibilgailua, berriz, Ford Escort bat zen, “zubia” egina eta gidariaren ateko sarraila bortxatuta zeuzkana. Ondoren eginiko ikerketetan argitu zen turismoa Areetan lapurtua zela eta norbaitek Bilboraino joateko erabili zutela, lurrin-denda batean lapurreta egiteko. Atxilotuetako bat Getxoko Guardiako Epaitegira eraman zuten, eta bestea, adingabekoa dena, Adingabekoen Fiskaltzara. Ihes egin zuten beste bi gazteak identifikatzeko ikertzen jarraitzen dute udaltzainek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun