Getxoko Habanera Jaialdiaren lehenengo egunean, irailak 13a, Portugaleteko Orfeon Jarrillero taldeak jo zuen. Taldeak gizonezkoen 35 ahots ditu eta bere errepertorioaren barruan besteak beste moteteak, abesti erlijiosoak, musika profanoa, habanerak, biribilketak, zortzikoak, operako piezak eta zartzuela herrikoienetakoak ditu baina, horiek guztiak gorabehera, euren espezialitate nagusia habanerak dira.
Biharamunean, Marina Rosell abeslari ospetsua jardun zen Areetan. Rossell itsas-abestien eta habaneren ahots handienetakoa da. 1976 urtean hasi zuen bere ibilbidean zehar artista katalanak hamabost bat lan argitaratu ditu. Ibilbide horretan Marina Rosellek oso ezagunak diren beste artista batzuekin abestu du, adibidez Georges Moustaki, Montserrat Caballe, Luis Eduardo Aute, Carlos Cano edo Pedro Guerrarekin, edo Tomatito gitarra-jole flamenkoarekin. Abeslari katalanak birak egin ditu Europan, Ameriketan eta Afrikan abestuz eta horietan ere arrakasta handia lortu du publikoaren artean.
Azkenik, jaialdia amaitzeko, Valladolideko Habaneras de Agua Dulce taldea aritu zen Areetan. 1998 urtean sortu zenetik zazpikote horrek habanera ulertzeko era berria ekarri dio tradiziozko jenero horri, penintsularen itsasertzeko eta barrualdeko bere errepertorioko abestirik herrikoenei esker, baina baita lirika garaikideko konpositore espainiar eta hispano-amerikar handienen partitura konplexuei esker ere.
Bestelakoak
Kontzertuez gain, aurten publikoak "Getxo eta itsasoa" argazki erakusketaz gozatzeko aukera izan du. Bertan, itsasoari lotutako zenbait argazki egon dira ikusgai. Halaber, beste nobedade bat egon da aurtengo jaialdian: Itsas Azoka, hain zuzen ere. Besteak beste, azokan itsaskiak, bakailaoa, kontserbak eta oroigarriak egon dira salmentan, Areetako Geltokia plazan. Produktu salduenak itsaskiak eta bakailaoa izan dira Itsas Azokan. Erakusketarekin batera, azokak 3.000 lagunen bisita jaso du.
Getxoko Habanera Jaialdiak arrakasta handia izan du Getxoko Kultur Etxearen aburuz, izan ere, erakunde horrek egindako kontuen arabera, hiru egunetan 9.000 lagun bildu dira musika saioetan, itsas-soinuez gozatzeko. Ohikoa denez, kontzertu guztiak Areetako Xake plazako karpan izan dira eta bertan Euskal Herriko, Herrialde Katalanetako eta Gaztelako taldeak eta artistak jardun dira, itsas-abestia ulertzeko era oso desberdinak erakutsiz. “Getxo eta itsasoa” erakusketari eta Itsas-Azokari dagokienez, 3.000 bisitari ekarri dituzte, beti ere Kultur Etxearen arabera. Ildo beretik, 60.000 lagun bildu ei ziren irailaren hasieran eginiko Getxo Folk jaialdian, eta beste 31.000 pertsona uztailean eta abuztuan izandako Letren Terrazetan. Argazkian, Marina Rosell abeslaria.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun