“Zutabe” ETAren aldizkariak banatuz erakunde hori lagundu egin zutela egotzita, Erandioko auzokidea den Erika Bilbao eta Bizkaiko beste zortzi gazte epaituko dituzte ostegun honetan, Espainiako Auzitegi Nazionaleko Penaleko Bigarren Aretoan. Auziperatu guztientzako seina urteko espetxe zigorra eta 1.800 euroko kalte ordaina eskatu zuen urtarrilean Jesus Alonso fiskalak eta, agentzien arabera, kasuko fiskal berriak, Olga Sanchez, espetxe zigor bera eskatu du. Urtarrilaren 11n epaiketa bertan behera gelditu zen akusazioaren aldeko lekukotasuna eman behar zuten hainbat polizi epaiketara joaterik ez zuelako izan, tartean Afganistanen zebilen bat.
Guardia Zibilaren txostenetan oinarritutako akusazioaren arabera, Ibon Goitia, Iker Legarra, Mikeldi Zenigaonaindia eta Mitxel Zenarruzabeitiari leporatzen diete 2005eko martxoaren 23an Lekeitiotik Anoetara bidaiatzea, bertan “Zutabe” aldizkariaren 107 zenbakiko aleak, paperezkoak zein digitalak, hartu eta, Bizkaian bueltan, Leioan Erika Bilbaori eman izana. Bertsio horren arabera, Lekeitiorantz berriro zihoazela kontrol batean harrapatu zituzten Ermuan 60 bat aldizkari eta 10 CDekin. Sumario berean auziperatuta daude Xabier Erkiaga, Jon Akarregi, Gaizka Likona eta Urtzi Etxeberria. Erika Bilbao bere kabuz aurkeztu zen 2005eko maiatzaren 18an Espainiako Auzitegi Nazionalean, Madrilen, eta aske utzi zuten, 6.000 euroko fidantzapean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun