Leioako gazte bat Gurutzetako ospitalera anbulantziaz eraman behar izan zuten pasa den larunbatean, goizeko 1:30ak aldera, Urdulizko geltokian jaso zuen erasoa dela eta. UKBERRI.NETi lekuko batek adierazi dionez, Y.M. 24 urteko gazte leioztarra ikusi zuen Urdulizko geltokitik irteten, "buruan zauri larria" zeukala. Bere egoera "bat ere ona" ez zen arren "oso lasai" zuzendu zitzaien bertaratu ziren ertzainei eta metroko zaindariek "arrazoirik gabe" bera kolpatu eta bere neska laguna mehatxatu zutela esan zien. Gainera, ertzainei salaketa jarriko zuela eta metroko bideo-kamerek bere hitzak baieztatuko zutela esan zien, anonimotasuna nahiago izan duen lekukoaren arabera. Y.M.-k ertzainei esan zienez kolpatu baino lehen edaten ari zen kalimotxoa metrora sartu baino lehen botatzeko esan zioten zaindariek eta berak horrela egin zuen. Era berean, aurreko egunean, zaindariek bost laguni bidaiatzea debekatu zieten Urdulizen ere. Irudian, Sare Antifaxistak hainbat garraioetako zaindarien erasoak salatzeko eginiko pegatina.
Pasa den abuztuan, Sare Antifaxistako kideek UKBERRI.NETi adierazi zioten Metro Bilbaoko zaindarien artean hainbat ultraeskuindar eta Falangeko kideak daudela eta beraiei leporatu zieten azken urteotan garraio horretan izandako "oldarraldiak", 2006ko abenduraino 200 bat, Metro Bilbaoko iturri batzuen arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun